گجرات میں پولیس نے مقامی کاروباری شخصیت اور مسلم لیگ (ن) رہنما حاجی اورنگزیب بٹ سمیت 27 دیگر افراد کے خلاف مبینہ طور پر گوجرانوالہ الیکٹرک پاور کپمنی (گیپکو) کے 2 لائن مینز کو اغوا کرنے اور سرکاری امور میں مداخلت کے الزام مقدمہ درج کرلیا ہے۔
حاجی اورنگزیب بٹ کے علینہ شاپنگ مال کا بجلی کا کنکشن 4 لاکھ 79 ہزار 938 روپے کے بل کی عدم ادائیگی کی وجہ سے منقطع کر دیا گیا تھا۔
اشتیاق بٹ، حمید ملک اور 25 دیگر نامعلوم ساتھیوں کے ہمراہ اورنگزیب بٹ فوارہ چوک کے قریب گیپکو دفتر پہنچے اور دفتر کا فرنیچر توڑ پھوڑ دیا، بعدازاں وہ لائن مین طارق اور نعیم کو ساتھ لے گئے اور ان سے اپنے پلازے کا بجلی کا کنکشن بحال کرنے کا کہا۔
پولیس نے گیپکو کی رپورٹ پر 28 افراد کے خلاف تعزیرات پاکستان کی دفعہ 365، 353، 440، 186، 147 اور 149 کے تحت مقدمہ درج کرکے تفتیش شروع کردی ہے۔
اورنگزیب بٹ نے اپنے خلاف درج مقدمے کو مکمل طور پر من گھڑت قرار دیا اور گیپکو حکام پر بلیک میلنگ کے حربے استعمال کرنے کا الزام عائد کیا۔
انہوں نے کہا کہ ’لگ بھگ 3 برس قبل شاپنگ مال جل جانے کے بعد بھی ہم نے 65 لاکھ روپے کا بھاری بل ادا کیا تھا، حال ہی میں ہم نے بجلی کے 3 میٹروں کا بل ادا کیا جبکہ چوتھا میٹر غائب تھا۔
اورنگزیب بٹ نے گیپکو عملے کی بدعنوانیوں کی نشاندہی کرنے کا عزم کرتے ہوئے بتایا کہ انہیں مقدمے میں قبل از گرفتاری ضمانت مل گئی ہے۔
