کراچی کے علاقے کیماڑی میں کے پی ٹی گراؤنڈ کے قریب بینظیر انکم سپورٹ پروگرام کی رقم کی تقسیم کے دوران بھگدڑ مچنے سے 12 خواتین بے ہوش اور زخمی ہوگئیں جن میں سے ایک کی حالت تشویشناک ہے۔
تھانہ جیکسن کے اسٹیشن ہاؤس افسر (ایس ایچ او) بابر حمید نے بتایا کہ کے پی ٹی گراؤنڈ میں نقد رقم وصول کرنے کے لیے بڑا مجمع اکٹھا ہوا، جب خواتین اندر داخل ہوئیں تو دروازے کا لاک ٹوٹ یا کھل گیا، جس کے نتیجے میں بھگدڑ مچ گئی۔
ان کا کہنا تھا کہ تقریباً 13-12 خواتین زخمی اور بے ہوش ہوئیں، جنہیں سول ہسپتال منتقل کیا گیا، ان کی حالت خطرے سے باہر بتائی جا رہی ہے۔
ایس ایچ او نے افسوس کا اظہار کیا کہ پورے ضلع کیماڑی میں بینظیر انکم سپورٹ پروگرام کا صرف ایک تقسیمی مرکز ہے جہاں نہ صرف مچھر کالونی، مشرف کالونی بلکہ کھارادر اور میٹھادر سے بھی خواتین نقد رقم وصول کرنے آتی ہیں۔
ان کا کہنا تھا کہ تقریباً 2 سے 3 ہزار خواتین جمع ہوئی تھیں، ایس پی بلدیہ ٹاؤن اور ضلعی انتظامیہ موقع پر پہنچ گئی تھی، اب صورتحال نارمل ہے۔
پولیس سرجن ڈاکٹر سمعیہ سید نے ڈان ڈاٹ کام کو بتایا کہ ایک خاتون کی حالت تشویشناک ہے۔
خیال رہے کہ ملک میں جاری شدید گرمی کے لہر کے باعث بینظیر انکم سپورٹ پروگرام کے تحت رقم کی فراہمی 2 روز کے لیے معطل کردی گئی تھی اور آج یہ سلسلہ دوبارہ بحال ہوا تھا۔ ’ ریڈیو پاکستان نے بینظیر انکم سپورٹ پروگرام کے ترجمان کے حوالے سے بتایا کہ رقم دینے کا عمل بدھ تک جاری رہے گا، جو عیدالضحیٰ کے بعد 3 جولائی کو دوبارہ شروع ہوگا۔
