بالی ووڈ اداکارہ کاجول دیوگن کی والدہ اور سینئر اداکارہ تنوجا آئی سی یو میں زیر علاج رہنے کے بعد صحت یاب ہوکر گھر لوٹ آئیں۔
بھارتی میڈیا رپورٹس کے مطابق 80 سالہ سینئر اداکارہ تنوجا ضعیف العمر اور مختلف بیماریوں کے باعث گزشتہ اتوار کو مقامی اسپتال منتقل ہوئی تھیں۔ انہیں علاج کی غرض سے انتہائی نگہداشت یونٹ (آئی سی یو) میں رکھا گیا تھا۔
تاہم طبیعت بہتر ہونے کی صورت میں گزشتہ شب اسپتال سے چھٹی دے دی گئی ہے، جس کے بعد سینئر اداکارہ ممبئی میں اپنی رہائش گاہ پر منتقل ہوگئی ہیں۔
سینئر اداکارہ تنوجا کا شمار 60 اور 70 کی دہائی کی مقبول ترین اداکاراؤں میں ہوتا ہے۔
انہوں نے 1950 میں اپنی والدہ شوبھنا سمرتھ کی ہدایت کاری میں بننے والی پہلی فلم ’ہماری بیٹی‘ سے بطور چائلڈ آرٹسٹ اپنے فلمی کیریئر کا آغاز کیا تھا۔
انہوں نے ہندی اور بنگالی فلموں میں اپنی اداکاری کا لوہا منوایا ہے۔
