سوشل میڈیا پر متحرک رہنے والی بھارتی اداکارہ کرشما تنا نےانکشاف کیا ہے کہ ان کے والد نے ان کی پیدائش کے ایک ماہ بعد تک ان کا چہرہ نہیں دیکھا تھا کیونکہ انہیں بیٹے کی خواہش تھی۔
بھارتی میڈیا کو دیے گئے ایک انٹرویو کے مطابق کرشما تنا دو بہنوں میں چھوٹی ہیں اور جب ان کی پیدائش کی خبر ان کے والد کو دی گئی تو خوش نہیں ہوئے تھے کیوں کہ انہیں بیٹے کی خواہش تھی۔
انہوں نے بتایا کہ ان کی والدہ نے انہیں بتایا کہ تمہارے والد تمہاری پیدائش پر خوش نہیں تھے اور ان پر ان کے والدین کی جانب سے کافی دباؤ تھا کہ انہیں بیٹا چاہیئے جیسا کہ عام روایتی گجراتی خاندانوں میں ہوتا ہے کہ بیٹا ان کی نسل کو آگے لے کر چلے گا اور زیادہ کماکر کھلائے گا جبکہ بیٹیاں بوجھ ہوتی ہیں۔
کرشما تنا کے مطابق ان کے دادا اور دادی کا رویہ ان کی والدہ کے ساتھ غیر مناسب تھا کیونکہ انہوں نے 2 بیٹیوں کو جنم دیا تھا۔
کرشما تنا نے کہا کہ جب میری والدہ نے مجھے بتایا تو یہ سن کر میرا دل ٹوٹ گیا تھا اس لیے نہیں کہ میرے والد کو مجھ سے محبت نہیں تھی بلکہ اس لیے کہ ان کی دوسری اولاد بھی لڑکی تھی اور پھر ان پر بیٹے کے لئے خاندان کا دباؤ بھی تھا جس کی وجہ سے وہ مجھے دیکھنے بھی نہیں آسکے تھے، میرے والد کو بیٹیاں پسند تھیں لیکن وہ اپنے خاندان کو یہ کیسے بتاتے۔
انہوں نے مزید بتایا کہ اس دن فیصلہ کرلیا تھا اور والد سے کہا کہ میں وہ سب کچھ کرکے دکھاؤں گی جو ایک لڑکا کرسکتا ہے میں آپ کا بیٹا بن کے دکھاؤں گی اور میں نے کر دکھایا۔
