پاکستان اسٹاک ایکسچینج میں آج بھی ٹریڈنگ کے دوران شیئرز کی قیمتوں میں اضافہ ہوا جب کہ معاشی تجزیہ کاروں نے مارکیٹ میں پائے جانے والے مثبت رجحان کی وجہ روپے کی قدر میں بہتری اور مانیٹری پالیسی میں عدم تبدیلی کی توقعات کو قرار دیا۔
پاکستان اسٹاک ایکسچینج بینچ مارک سہ پہر 3 بجے تک ’کے ایس ای 100 انڈیکس‘ 517.57 پوائنٹس یا 1.24 فیصد اضافے کے ساتھ 42,128.99 پوائنٹس پر پہنچ گیا۔
انٹر مارکیٹ سیکیورٹیز میں ریسرچ کے سربراہ رضا جعفری نے کہا کہ اسٹیٹ بینک آف پاکستان کی جانب سے پیر کے روز مانیٹری پالیسی کے اعلان سے قبل ٹی بل میں کمی اور روپے کی قدر میں بہتری کی وجہ سے کے ایس ای 100 انڈیکس’ اوپر جا رہا ہے۔
انہوں نے مزید کہا کہ آئندہ ہفتے کے دوران وفاقی وزیر خزانہ شوکت ترین کی جانب سے واشنگٹن میں پاکستان کے مالی معاملات سے متعلق گفتگو کے دوران آئی ایم ایف کے ممکنہ نرم مؤقف کی بھی توقع کی جا رہی ہے۔
چیف ایگزیکٹو آفیسر اے کے وائی سیکیورٹیز امین یوسف نے کہا کہ کے ایس ای 100 انڈیکس’ میں اضافے کی بنیادی اور سب سے اہم وجہ روپے کی قدر میں بہتری اور وزیر خزانہ اسحٰق ڈار کا ڈالر کی قیمت کم کرکے 200 روپے تک لانے کا بیان تھا۔
انہوں نے مزید کہا کہ مارکیٹ کو توقع ہے کہ اس مرتبہ شرح سود برقرار رکھے جانے کی توقع ہے جب کہ اسٹیٹ بینک کی مانیٹری پالیسی کمیٹی (ایم پی سی) کی آئندہ میٹنگ میں اس میں کمی کا امکان ہے اور مارکیٹ میں پائی جانے والی یہ توقعات کے ایس ای 100 انڈیکس’ کو اوپر لے جا رہی ہیں۔
عارف حبیب کارپوریشن کے احسن محنتی نے کہا کہ ایشیائی ترقیاتی بینک کی جانب سے تقریباً ارب 50 کروڑ سے 2 ارب 30 کروڑ ڈالر کی امداد کے اعلان اور ستمبر میں تجارتی خسارے میں کمی نے انتہائی اہم کردار ادا کیا۔
پاکستان بیورو آف اسٹیٹسٹکس کی جانب سے رواں ہفتے جاری کیے گئے عارضی اعداد و شمار سے ظاہر ہوتا ہے کہ ستمبر میں درآمدی بل 19.72 فیصد کم ہو کر 5ارب 26 کروڑ ڈالر ہوگیا جو کہ گزشتہ سال سال کے اسی ماہ میں 6ارب 56 کروڑ ڈالر تھا جب کہ ماہانہ بنیادوں پر درآمدی بل میں 13.21 فیصد کی کمی واقع ہوئی۔
درآمدات میں کمی کے نتیجے میں ستمبر میں تجارتی خسارہ 30.62 فیصد کم ہو کر رواں سال 2 ارب 88 کروڑ ڈالر رہ گیا جو گزشتہ سال کے اسی ماہ کے دوران 4ارب 15 کروڑ ڈالر تھا۔
ڈائریکٹر فرسٹ نیشنل ایکوئٹیز لمیٹڈ عامر شہزاد نے کہا کہ مارکیٹ کے بنیادی رجحانات مثبت لگ رہے ہیں جب کہ سیلاب متاثرین کی امداد اور بحالی کے لیے فنڈز موصول ہو رہے ہیں۔
انہوں نے کہا کہ اگر ملک کی سیاسی صورتحال میں استحکام آجائے تو تو مارکیٹ45 ہزار پوائنٹس کی حد کو بھی عبور کر سکتی ہے۔
