آزاد کشمیر کی وادی نیلم میں چھڑی کے مقام پر وین کھائی میں گرگئی، حادثے کے نتیجے میں 6 خواتین جاں بحق اور 5 خواتین سمیت 8 افراد زخمی ہوگئے۔
نیلم ڈیزاسٹر مینجمنٹ آفیسر اختر ایوب کے مطابق واقعہ دن 12 بجکر 30 منٹ پر پیش آیا جب گاڑی میں سوار تمام خواتین ووٹ ڈالنے کے بعد واپس گھر جارہی تھیں۔
خیال رہے کہ مظفر آباد کے تین اضلاع میں 31 سال بعد بلدیاتی انتخابات آج ہو رہے ہیں جس کے لیے پولنگ جاری ہے۔
اختر ایوب نے بتایا کہ دودھنیال بیسانوالی سے چھڑی جانے والی گاڑی گہری کھائی میں جا گری، ریسکیو عملے کی جانب سے امدادی سرگرمیاں جاری ہیں۔
پولیس کے مطابق حادثے میں 5 خواتین جاں بحق سمیت 3 افراد زخمی ہو گئے، حادثے میں ڈرائیور زخمی ہے۔
پولیس حکام نے بتایا جاں بحق خواتین کی شناخت 50 سالہ شمیم بی بی زوجہ حسین، 80 سالہ زیور جان زوجہ بشیر ملک ، 90 سالہ صاحبزادی بیوہ امین ملک، 95 سالہ الطاف جان زوجہ عمران ملک، 70 سالہ بی بی گڈی زوجہ اصغر ملک اور 50 سالہ رانی بی بی زوجہ حسین ساکنہ بیساں والی دودھنیال شامل ہیں۔
اختر ایوب کا کہنا تھا کہ بیساں والی دودھنیال پولنگ اسٹیشن نمبر 7 اور 8 میں پولنگ کا عمل عارضی طور پر روک دیا گیا ہے۔
انہوں نے بتایا کہ حادثے میں ہونے والے زخمیوں کو ابتدائی طبی امداد کیلئے بی ایچ یو دودھنیال منتقل کر دیا گیا ہے۔
آزاد کشمیر کے وزیراعظم سردار تنویر الیاس نے حادثے پر افسوس کا اظہار کرتے ہوئے مقامی انتظامیہ کو متاثرین کی تدفین اور زخمی افراد کے علاج کے لیے مدد اور تعاون کی ہدایات جاری کی ہیں۔
