راولپنڈی: وزیر ہوا بازی غلام سرور خان نے کہا ہے کہ ملکی پروازوں کی معطلی کی مدت جمعرات کی رات ختم ہورہی ہے جس کے بعد ڈومیسٹک پروازوں کی محدود بحالی کا فیصلہ کرلیا گیا ہے۔
تاہم ان کا کہنا تھا کہ اس سلسلے میں حتمی فیصلہ وزیراعظم کی سربراہی میں قومی رابطہ کمیٹی کے اجلاس میں کیا جائے گا۔
وزیر ہوا بازی نے بتایا کہ ملکی پروازوں کی بحالی پر اسلام آباد میں منعقدہ اعلیٰ سطح کے اجلاس میں تفصیل سے گفتگو ہوئی۔
اجلاس میں چاروں صوبوں کے وزرائے اعلیٰ، نیشنل ڈزاسٹر منیجمنٹ کے حکام، محکمہ صحت اور گلگت بلتستان کے نمائندوں نے شرکت کی۔
وزیر ہوا بازی کا کہنا تھا کہ پاکستان انٹرنیشنل ایئر لائن کے ساتھ محکمہ ہوا بازی نے ابتدائی طور پر 4 ایئرپورٹس سے ملکی پروازیں چلانے کا فیصلہ کیا ہے جو کراچی، لاہور، اسلام آباد اور کوئٹہ ہیں۔
ان کا مزید کہنا تھا کہ تعمیراتی صنعت، چھوٹی دکانوں اور زراعت کو پہلے ہی اپنا کاروبار بحال کرنے کی اجازت دے دی گئی تھی اور چونکہ عیدالفطر قریب ہے اس لیے ’ہم نے آج کے اجلاس میں چھوٹے تاجروں کے مسئلے پر بات کی تا کہ عید سے قبل عوام کو سہولت فراہم کی جائے‘۔
ان کا کہنا تھا کہ ہم اس پوزیشن میں ہیں کہ ملکی پروازوں کا آپریشن بحال کردیں لیکن ہماری اولین ترجیح کورونا وائرس سے لوگوں کی جانیں بچانا ہے‘۔
غلام سرور خان نے بتایا کہ اس سلسلے میں اسٹینڈرڈ آپریٹنگ پروسیجرز(ایس او پیز) تیار کرلیے گئے ہیں اور وزیراعظم عمران خان عوام کے بہترین مفاد میں فیصلہ کریں گے۔
یاد رہے کہ کورونا وائرس کی وبا پھوٹنے کے بعدکووِڈ 19 کے پھیلاؤ کو روکنے کے لیے بین الاقوامی اور ملکی پروازوں کا آپریشن 30 اپریل تک معطل کیا گیا تھا۔
تاہم بعد میں پروازوں کی بندش میں توسیع کرتے ہوئے اسے 7 مئی تک بڑھا دیا گیا تھا۔
اس ضمن میں محکمہ ہوا بازی کے سینئر جوائنٹ سیکریٹری نے کہا کہ چونکہ پروازوں کی معطلی کی مدت جمعرات کی رات اختتام پذیر ہورہی ہے چنانچہ اب وزیراعظم پر منحصر ہے کہ آپریشن کی بحالی یا معطلی میں توسیع کا فیصلہ کریں۔
