بالی ووڈ کی معروف اداکارہ عالیہ بھٹ کا کہنا ہے کہ اُنہیں اپنے کیریئر کے عروج پر ماں بننے کی ذمہ داری اُٹھانے پر بالکل بھی پچھتاوا نہیں ہے۔
عالیہ بھٹ نے اپنے ایک حالیہ انٹرویو میں اپنے اصولوں کے مطابق زندگی گزارنے کے بارے میں بات کی ہے۔
اُنہوں نے کہا کہ زندگی میں کچھ بھی صحیح یا غلط نہیں ہوتا کیونکہ ہوسکتا ہے کہ جو میرے لیے صحیح ہے وہ کسی اور کے لیے غلط ہو۔
اُنہوں نے مزید کہا کہ میں ہمیشہ سے اپنے دل کی سنتی آئی ہوں کیونکہ آپ پوری زندگی کی منصوبہ بندی نہیں کر سکتے بلکہ زندگی خود آپ کے لیے منصوبہ بندی کرتی ہے اور آپ کو صرف زندگی میں سامنے آنے والے راستے پر چلنا ہوتا ہے۔
عالیہ بھٹ نے کہا کہ چاہے پھر وہ فلمیں ہوں یا کچھ اور، میں ہمیشہ اپنے دل کو ہی فیصلہ کرنے دیتی ہوں۔
اُنہوں نے کہا کہ میں نے اپنے کیریئر کے عروج پر شادی کرنے اور بچہ پیدا کرنے کا فیصلہ کیا، لیکن کون کہتا ہے کہ شادی یا پھر ماں بننا میرے کام کو متاثر کرے گا؟
اُنہوں نے مزید کہا کہ یہاں تک کہ اگر میرا کام متاثر ہوتا بھی ہے تو ہوجائے، مجھے پرواہ نہیں ہے کیونکہ میں جانتی تھی کہ زندگی میں مجھے بچہ پیدا کرنے کے فیصلے پر کبھی پچھتاوا نہیں ہوگا۔
عالیہ بھٹ نے اپنی بات مکمل کرتے ہوئے کہا کہ یہ فطری ہے اور میرا ماں بننے کا فیصلہ بہترین ہے، میں آج سے پہلے کبھی اتنا زیادہ خوش یا مطمئن نہیں ہوئی۔
واضح رہے کہ اداکار رنبیر کپور اور اداکارہ عالیہ بھٹ کے گھر گزشتہ سال 6 نومبر کو بیٹی کی پیدائش ہوئی، جس کا نام راہا کپور رکھا گیا ہے۔
