20 جنوری کو پاکستان کرکٹ ٹیم کے سابق کپتان شعیب ملک اور شوبز انڈسٹری کی معروف اداکارہ ثناء جاوید نے شادی کی جس کے بعد اداکار و میزبان احمد علی بٹ اداکارہ کے سابق شوہر گلوکار عمیر جیسوال کی حمایت میں سامنے آ گئے۔
حال ہی میں اداکار و میزبان احمد علی بٹ نے سوشل میڈیا کی فوٹو اینڈ ویڈیو شیئرنگ ایپ انسٹاگرام پر ایک اسٹوری شیئر کی جس میں انہیں گلوکار عمیر جیسوال کی تعریف کرتے دیکھا گیا۔
اپنی اسٹوری میں انہوں نے لکھا کہ “میرے دوست تم ایک شیر اور سونے کا دل رکھنے والے شریف انسان ہو”۔
ان کا کہنا تھا کہ “مصیبت کے وقت میں انسان کو ہمت کی ضرورت ہوتی ہے، ہم سب کے پاس اپنے اپنے مسائل ہیں لیکن اہم ہے کہ ہم ان مسائل سے کیا سیکھتے اور کیسے آگے بڑھتے ہیں”۔
احمد علی بٹ نے عمیر جیسوال کیلئے نیک خواہشات کا اظہار کرتے ہوئے مزید لکھا کہ “آگے بڑھتے رہیں بھائی، اللہ آپ کو اور آپ کے گھر والوں کو سلامت رکھے”۔
