کراچی:
سدرن پنجاب کی ٹیم فتح کا راستہ بھول گئی، لگاتار چھٹی شکست مقدر بن گئی۔راولپنڈی میں کھیلے گئے قومی ٹی 20 کپ کے 18 ویں میچ میں سینٹرل پناب نے سدرن کو 7 وکٹ سے مات دے دی، یہ سدرن پنجاب کی لگاتار چھٹی ناکامی اور اس وقت وہ پوائنٹس ٹیبل پر بغیر کسی پوائنٹ کے آخری نمبر پر موجود ہے۔
گدشتہ روز کھیلے گئے میچ میں سدرن کی پوری ٹیم 119 رنز پر ڈھیر ہوئی، اعظم خان نے 45 اور آغا سلمان نے 40 رنز بنائے، باقی کوئی بھی کھلاڑی 9 رنز سے آگے نہیں بڑھ سکا، حسن علی نے 4 اور فہیم اشرف نے 3 وکٹیں لیں۔ جواب میں سینٹلرل نے 3 وکٹ پر 17.2 اوورز میں ہدف حاصل کرلیا، کپتان بابر اعظم نے ناقابل شکست 59 رنز بنائے، کامران اکمل بھی 28 رنز کے ساتھ نمایاں رہے، حسن خان نے 2 وکٹیں لیں۔ اس سے قبل ناردرن نے خیبرپختونخوا کو 14 رنز سے شکست دی۔ 182 رنز کے تعاقب میں خیبرپختونخوا کی ٹیم 8 وکٹوں کے نقصان پر 167 رنز ہی بناسکی۔
نصف سنچری بنانے اور 2 کھلاڑیوں کو پویلین کی راہ دکھانے پر محمد نواز کو پلیئر آف دی میچ کا ایوارڈ دیا گیا۔ مطلوبہ ہدف کے تعاقب میں کے پی کے کپتان محمد رضوان 17، اسرار اللہ 25 اور صاحبزادہ فرحان13 رنز بناکر پویلین واپس لوٹ گئے، ایسے میں افتخار احمد نے مزاحمت کی بھرپور کوشش کی۔
انھوں نے حریف بولرز پر چھکوں کی بارش کرتے ہوئے دلکش نصف سنچری اسکور کی مگروہ بھی اپنی ٹیم کو فتح دلانے میں کامیاب نہ ہوسکے۔ انھوں نے 34 گیندوں پر 58 رنز کی جارحانہ اننگز کھیلی۔ اس اننگز میں 5 چھکے اور 2 چوکے شامل تھے، اس دوران انھوں نے آصف آفریدی اور عادل امین کے ہمراہ بالترتیب 45 اور 36 رنز کی شراکت قائم کی، ایک موقع پر خیبرپختونخوا کو جیت کیلیے آخری 12 گیندوں پر 28 رنز درکار تھے تاہم سہیل تنویر کی نپی تلی بولنگ کے سامنے شاہین شاہ آفریدی اور محمد عمران 19ویں اوور میں صرف 5 رنز ہی بناسکی۔
علی عمران نے آخری اوور میں صرف 8رنز دے کر ناردرن کو 14 رنز سے فتح دلادی، شاہین آفریدی 13 رنز بناکر ناٹ آٹ رہے، علی عمران نے 5 اسکور بنائے، ناردرن کے حارث رف نے میچ میں تین جبکہ محمد نواز نے 2 وکٹیں حاصل کیں۔ علی عمران، شاداب خان اور سلمان ارشاد نے ایک ایک کھلاڑی کو آٹ کیا۔اس سے قبل ناردرن نے پہلے بیٹنگ کا آغاز کیا تو شاہین شاہ آفریدی کی تباہ کن بولنگ کی بدولت اس کی ابتدائی 2وکٹیں محض ایک کے مجموعی اسکور پر اس وقت گریں جب علی عمران اور حیدر علی کھاتہ کھولے بغیر پویلین واپس روانہ ہوگئے۔
چوتھے نمبر پر میدان میں اترنے والے عمر امین نے اوپنر ناصر نواز کے ہمراہ 52 رنز کی شراکت قائم کرکے ناردرن کیلیے ری بلڈنگ کے عمل کا آغاز کیا، عمرا مین 27 اور ناصر نواز 24 رنز بناکر آوٹ ہوئے تاہم ناردرن کی اننگز کی طویل ترین پارٹنرشپ کپتان شاداب خان اور محمد نواز نے بنائی، دونوں بیٹرز نے پانچویں وکٹ کیلیے 89 رنز کی شراکت قائم کرکے ٹیم کا مجموعہ 180 کے پار پہنچانے میں اہم کردار اداکیا۔
محمد نواز نے 34 گیندوں پر 3 چھکوں اور ایک چوکے کی بدولت 51 رنز کی اننگز کھیلی۔ وہ ٹورنامنٹ میں گیارہ چھکے لگا کر اب تک نیشنل ٹی ٹونٹی میں سب سے زیادہ چھکے لگانے والے کھلاڑیوں کی فہرست میں پہلے نمبر پر پہنچ گئے ہیں، شاداب خان نے 2 چھکوں اور 6 چوکوں کی بدولت 170 کے اسٹرائیک ریٹ سے 46 رنز کی اننگز کھیلی۔آصف علی نے بھی برق رفتار 21 رنز بنائے، ناردرن نے مقررہ بیس اوورز میں 7 وکٹوں کے نقصان پر 181 رنز بنائے۔ شاہین شاہ آفریدی نے 2 جبکہ اسرار اللہ، عمران خان سینئر اور آصف آفریدی نے ایک ایک وکٹ حاصل کی۔
