پاکستان شوبز انڈسٹری کی معروف و سینئر اداکارہ ریشم نے معروف اداکارہ و ہدایتکارہ سکینہ سمو کو منافق قرار دے دیا۔
یاد رہے کہ 2021 میں مایاناز اداکارہ ریشم کو فلم اور ٹیلی ویژن کے لیے ان کی خدمات پر صدارتی ایوارڈ سے نوازا گیا تھا، جس پر سینئر اداکارہ و ہدایتکارہ سکینہ سمو نے اعتراض کرتے ہوئے کہا تھا کہ علی ظفر اور ریشم اس ایوارڈ کے حقدار نہیں ہیں۔
اب حال ہی میں نجی چینل کے ایک پروگرام میں بطور مہمان شرکت کرتے ہوئے اداکارہ ریشم نے نجی زندگی اور اپنے کیرئیر کے حوالے سے کھل کر بات کی۔
میزبان کی جانب سے سکینہ سمو کے حوالے سے کیے جانے والے سوال کا جواب دیتے ہوئے اداکارہ ریشم نے کہا کہ میں ان کے بارے میں بات نہیں کرنا چاہتی، ایسے لوگ منافق ہوتے ہیں، اللہ معاف کرے، میں نے ان کے بارے میں کبھی کچھ نہیں کہا لیکن جب مجھے میرے کام کا صلہ دیا گیا اور اعزاز سے نوازا گیا تو انہیں بہت تکلیف ہوئی۔
انہوں نے مزید کہا کہ جب مجھے اور علی ظفر کو پرائیڈ آف پرفارمنس کے اعزاز سے نوازا گیا تو وہ برداشت نہ کرسکیں اور ہم دونوں کے پیچھے ہی پڑ گئیں۔
ریشم نے بتایا کہ انہوں نے سکینہ سمو کے ساتھ ایک ڈرامے ’معافی‘ میں کام کیا، وہ اچھی ہدایت کارہ ہیں اور انہوں نے اس وقت میری بہت تعریف بھی کی اور منافقت دیکھیں جب اعزاز دیا گیا تو انہیں بُرا لگ گیا، وہ یہ بات مجھے کال کرکے بھی کہہ سکتی تھی لیکن انہوں نے میڈیا پر کہا۔ مجھے نہیں معلوم کہ وہ میرے ایوارڈ سے اتنی ناراض کیوں ہوئیں، میں نے بہت لگن سے کام کیا ہے اور اپنے ساتھیوں کو عزت دی ہے۔
انہوں نے کہا کہ آپ میرے ساتھیوں سے بھی پوچھ سکتے ہیں کہ ریشم کیسی شخصیت ہے؟ ہر کوئی آپ کو میری محنت اور ایمانداری کے بارے میں بتائے گا، آپ (سکینہ سمو) کون ہوتی ہیں یہ کہنے والی کہ مجھے بلاوجہ ایوارڈ دیا گیا یا میں حق دار نہیں تھی۔
