بالی ووڈ کنگ شاہ رخ خان کی جانب سے ایکشن سے بھرپور سیریز ’ڈان‘ کے تیسرے سیکوئل یعنی ڈان 3 کے لئے انکار کے بعد ان کی جگہ اداکار رنویر سنگھ نے لے لی۔
بھارتی میڈیا رپورٹس کے مطابق حال ہی میں پروڈیوسر رتیش سدھوانی نے ڈان 3 کے اسکرپٹ مکمل ہونے کی تصدیق کی تھی جس کے بعد سے یہ خبریں گردش کر رہی ہیں کہ ڈان 3 میں شاہ رخ خان ڈان کے روپ میں نظر نہیں آئیں گے۔
تاہم بھارتی میڈیا کا دعویٰ ہے کہ ڈان 3 میں شاہ رخ خان کے بجائے اداکار رنویر سنگھ کو اس آئیکونک ’ڈان‘ کے مرکزی کردار کے لیے فلم میں کاسٹ کر لیا گیا ہے۔
خیال رہے کہ فلم ’ڈان‘ کو اداکار اور فلمساز فرحان اختر نے ہدایت کاری دی تھی اور وہ باکس آفس پر بلاک بسٹر ثابت ہوئی تھی۔
2006 کو ریلیز ہونے والی یہ فلم 1978 میں ریلیز ہونے والی فلم ’ڈان‘ کی ری میک تھی جس میں پریانکا چوپڑا، ارجن رامپال، ایشا کپور، بومن ایران، پون ملہوترا، راجیش کھتر اور اوم پوری بھی شامل تھے۔
’ڈان‘ کی شاندار کامیابی کے بعد فرحان اختر اور رتیش سدھوانی نے مل کر ’ڈان 2‘ بنائی جسے باکس آفس پر کامیابی ملی۔
شاہ رخ خان بلاک بسٹر ’پٹھان‘ کے بعد اپنی اگلی فلم ’جوان‘ میں نظر آئیں گے جو رواں برس 7 ستمبر کو ریلیز کی جائے گی۔
