معروف اداکار احمد علی اکبر نے اپنے ساتھ پیش آئے ایک غیر معمولی واقعے کی ویڈیو شیئر کی ہے جس نے مداحوں کو حیرانی اور خوف میں مبتلا کردیا۔
اداکار نے گزشتہ شب انسٹاگرام پر ایک ویڈیو شیئر کی جس میں انہوں نے صارفین کو تنبیہہ بھی کی کہ مذکورہ ویڈیو کچھ افراد کے لیے پریشانی کا باعث ہوسکتی ہے۔
ویڈیو میں دیکھا جا سکتا ہے کہ درخت میں ایک سکے جتنا سوراخ ہے جس میں سے ایسی آواز آرہی ہے گویا کوئی بہت تکلیف میں رو رہا ہو۔
احمد علی اکبر نے اس ویڈیو کے کیپشن میں لکھا کہ ‘ جو آپ دیکھ اور سُن رہے ہیں وہ جھوٹ نہیں ہے، اسلام آباد میں ٹرائل 5 پر شوٹنگ کے وقت ہمارے ساتھ یہ عجیب واقعہ پیش آیا’۔
اداکار نے بتایا کہ اس درخت پر سکے جتنے سوراخ میں سے یہ آواز آرہی ہے۔
احمد کی پوسٹ پر جہاں متعدد مداحوں نے حیرانی کا اظہار کیا وہیں اداکارہ و ماڈل انوشے اشرف نے کمنٹ کیا اور کہا کہ یہ درخت مدد کو پکار رہا ہے، رو رہا ہے اور اسے پانی کی اشد ضرورت ہے۔
انوشے اشرف نے لکھا کہ اس درخت کو بری طرح سے پانی کی کمی ہوگئی ہے، قدرت ان لوگوں کے لیے کہانیاں رکھتی ہے جو سنتے ہیں، اور یہ ایک انتباہی نشانیاں ہیں۔
اسی کے ساتھ انوشے نے ایک آرٹیکل کا لنک دیا جس میں درخت سے آنے والی آوازوں کی سائنسی وجہ بھی بتائی گئی۔
اس آرٹیکل میں محققین کی جانب سے بتایا گیا ہے کہ جب درخت خوش یا تکلیف میں ہوتے ہیں تو آواز نکالتے ہیں اور زیادہ تر ایسا خشک سالی کی صورت میں ہوتا ہے جب درختوں کو پانی کی ضرورت ہوتی ہے۔
