خودکشی کرنے والی بھارتی اداکارہ تنیشا شرما اور ان کے سابقہ بوائے فرینڈ، اداکار شیزان خان کی والدہ کے درمیان مبینہ فون کال لیک ہوگئی ہے۔
بھارتی میڈیا رپورٹس میں ایک آڈیو سامنے آئی ہے جس کے بارے میں یہ کہا جارہا ہے کہ اس آڈیو میں تنیشا شرما کی آواز ہے جوکہ شیزان کی والدہ کہکشاں فیضی سے بات کررہی ہیں۔
تنیشا کو اس آڈیو میں یہ کہتے ہوئے اور روتے ہوئے سنا جاسکتا ہے کہ’اماں، آپ میرے لیے بہت زیادہ معنی رکھتی ہیں، آپ یہ جانتی بھی نہیں ہیں، میرا ہر بات آپ کو بتانے کا دل کرتا ہے اور اس لیے میرے ذہن جو بھی ہوگا میں آپ کو ہر بات بتاؤں گی‘۔
اُنہوں نے مزید کہا کہ’ لیکن پتا نہیں، مجھے خود بھی نہیں پتا کہ مجھے کیا ہورہا ہے‘۔
دوسری جانب، شیزان خان کے وکیل، والدہ اور دونوں بہنوں شفق اور فلک ناز نے پریس کانفرنس کی۔
جس میں اُنہوں نے بتایا کہ شیزان پر لگنے والے تمام الزامات جھوٹے ہیں اور شیزان کا تنیشا سے تعلق بہت اچھا اور دوستانہ تھا۔
شیزان کی بہن فلک ناز نے میڈیا کو بتایا کہ’تنیشا ہماری اماں اور آپی سے ہر بات شیئر کرتی تھی، اس کی سوشل میڈیا پر حجاب پہنے ایک تصویر وائرل ہوئی اس پر کہا گیا کہ ہماری فیملی اس پر مذہب تبدیل کرنے کے لیے زور ڈال رہی ہے جوکہ بالکل جھوٹ ہے۔
اُنہوں نے انکشاف کیا کہ’تنیشا کام نہیں کرنا چاہتی تھی، وہ دنیا گھومنا چاہتی تھی، وہ بچی کبھی باہر نہیں نکلی تھی، پہلی بار ہمارے ساتھ سمندر پر گئی تھی، ہمیں فخر ہے کہ 5 ماہ ہم نے اسے بہت خوشیاں دیں‘۔
شیزان خان کے وکیل نے کہا کہ’دراصل اداکارہ کو ان کے گھر سے ہی کبھی پیار نہیں ملا اگر ملتا تو وہ گھر سے باہر محبت کو تلاش نہ کرتی‘۔
اس کے علاوہ شیزان کی والدہ نے پریس کانفرنس میں کہا کہ ’تنیشا کی والدہ ونیتا ہمیں بے انتہا بے عزت کرتی تھیں لیکن ہم نے کبھی کچھ نہیں کہا، میرا بچہ معصوم ہے اور وہ ابھی جیل میں ہے‘۔
اُنہوں نے تنیشا کی ماں سے مخاطب ہوتے ہوئے کہا کہ’تنیشامیری بیٹی جیسی تھی، آپ کی بیٹی نے خودکشی کرلی اور اب آپ چاہتی ہیں کہ میرا بیٹا بھی خودکشی کرلے؟‘
