بھارتی ریاست منی پور میں نسلی فسادات کے دوران 2 خواتین کے ساتھ انسانیت کو شرما دینے والے واقعے کے خلاف بالی ووڈ سے بھی آوازیں آنا شروع ہوگئیں۔
بالی ووڈ اداکارہ کیارا ایڈوانی نے اس واقعے سے متعلق سوشل میڈیا پر لکھا کہ منی پور میں خواتین پر تشدد کی ویڈیو خوفناک ہے جس نے مجھے ہلا کر رکھ دیا ہے۔
کیارا ایڈوانی نے لکھا کہ میں دعا کرتی ہوں کہ خواتین کو جلد سے جلد انصاف ملے اور ملزمان کو سخت ترین سزا دی جانی چاہیے جس کے وہ مستحق ہیں۔
اس کے علاوہ اداکار اکشے کمار نے بھی اس واقعے پر دکھ، افسوس اور غصے کا اظہار کیا ہے۔
اکشے کمار نے ٹوئٹر پر اس حوالے سے لکھا کہ منی پور میں خواتین پر تشدد کی ویڈیو نے مجھے دہلا دیا، امید ہے مجرموں کو ایسی سخت سے سخت سزا ملے گی کہ کوئی دوبارہ ایسا خوفناک کام کرنے کا سوچے گا بھی نہیں۔
اس کے علاوہ سونو سود اور دیگر اداکاروں نے بھی منی پور واقعے کی سخت مذمت کی ہے۔
واضح رہے کہ بھارتی ریاست منی پور میں نسلی فسادات کے دوران 2 خواتین کو برہنہ کر کے سر عام گھمانے اور مبینہ طور پر اجتماعی زیادتی کا نشانہ بنانے کی وائرل ویڈیو سامنے آئی تھی۔
