شوبز انڈسٹری میں متعدد معروف اداکاراؤں کے ساتھ کام کرنے والے میک اپ آرٹسٹ نعمان خان نے اپنے ساتھ پیش آنے والا بدسلوکی کا واقعہ سوشل میڈیا پر بیان کیا ہے۔
میک اپ آرٹسٹ نعمان خان نے اپنے ساتھ بدسلوکی سے پیش آنے والی اداکارہ کا نام لیے بغیر اُن کے رویے کے خلاف آواز اٹھائی ہے۔
اپنی انسٹاگرام ویڈیو میں نعمان خان کا بتانا ہے کہ پاکستان شوبز انڈسٹری کی ایک معروف اداکارہ ان کے ساتھ بہت بدسلوکی سے پیش آئیں جس کی وجہ سے اُنہیں ایک پراجیکٹ سے ہاتھ بھی دھونا پڑا۔
نعمان خان کا اپنے اس ویڈیو پیغام میں بتانا ہے کہ وہ اداکارہ اُن کے ساتھ عجیب طرح پیش آرہی تھیں، میرے وجہ پوچھے جانے پر اداکارہ مزید بھڑک اٹھیں اور سیٹ پر ہنگامہ کھڑا کر دیا۔
میک اپ آرٹسٹ کا بتانا تھا کہ اُس اداکارہ نے پروڈکشن سے ڈیمانڈ کردی کہ اگر میں سیٹ پر رہا تو وہ کام نہیں کریں گی جس پر میں نے خود ہی سیٹ چھوڑ دی کیوں کہ اُس پراجیکٹ کے صرف 2 دن ہی شوٹنگ کے باقی رہ گئے تھے۔
نعمان خان کا اداکارہ کے رویے پر افسوس کا اظہار کرتے ہوئے کہنا تھا کہ ہمارے اداکار بہت پاور رکھتے ہیں، اداکار کیمرے کے پیچھے کام کرنے والوں کی روزی روٹی چھیننے کی بھی طاقت رکھتے ہیں اور مشہور ہونے کے بعد کیریئر کے آغاز میں مدد کرنے والوں کو بھول جاتے ہیں۔
نعمان خان نے اپنی اس ویڈیو میں انکشاف کیا ہے کہ اب صرف کیمرہ مین، اسپاٹ بوائے اور میک اپ آرٹسٹ نہیں بلکہ اداکار ڈائریکٹرز کو بھی کھری کھری سُنا دیتے ہیں۔
واضح رہے کہ شوبز انڈسٹری میں بدمزاج اداکاراؤں سے متعلق پہلے بھی کئی خبریں سامنے آچکی ہیں جن کے سوشل میڈیا پر بھی خوب چرچے ہوتے ہیں۔
