بالی ووڈ فلم انڈسٹری کے مشہور و معروف اداکار راج کمار راؤ نے اپنی پہلی تنخواہ سے متعلق انکشاف کردیا ہے۔
حال ہی میں اپنے دیے گئے ایک انٹرویو میں اداکار راج کمار نے بالی ووڈ میں قدم رکھنے سے قبل کی زندگی سے متعلق کھُل کر بات کی۔
ان کا کہنا تھا کہ میرے والد گورنمنٹ سیکٹر میں ملازم تھے۔
انہوں نے بتایا کہ میں نے ملازمت کی شروعات بطورِ ڈانس ٹیچر کے کی تھی، میں ایک بچی کو ڈانس سکھانے جایا کرتا تھا اور میری پہلی تنخواہ 300 روپے تھی۔
اداکار نے کہا کہ جب مجھے میری زندگی کی پہلی تنخواہ 300 روپے ملی تو اس وقت میں آٹھویں جماعت کا طالب علم تھا۔
ان کا کہنا تھا کہ میں نے ان 300 روپے سے گھر کا راشن لیا جس میں دال، چاول، چینی اور نمک وغیرہ تھوڑی تھوڑی مقدار میں تھا۔
انہوں نے بتایا کہ میں نے یہ سامان لے جا کر اپنی والدہ کو دیا تو اس وقت جو خوشی مجھے محسوس ہوئی وہ دوبارہ کبھی نہیں ہو سکتی چاہے میں زندگی میں جتنا مرضی کما لوں۔
بالی ووڈ فلم انڈسٹری کے مشہور و معروف اداکار راج کمار راؤ کا مزید کہنا تھا کہ اب میں زندگی میں کسی کو کچھ بھی لے کر دے سکتا ہوں لیکن ان 300 روپے سے لیا ہوا سامان ہمیشہ میرے لیے خاص رہے گا۔
