کراچی میں امریکی قونصل جنرل اسکاٹ اربم اور امریکی مشن کے ارکان نے سندھ کلچر ڈے کے موقع پر اس دن کو منانے والے تمام افراد کے لیے امن اور خوشحالی کی دعائیں کیں۔
قونصل خانے کے ارکان نے سندھی زبان میں ویڈیو پیغامات کے ذریعے اپنی محبت کا اظہار کیا اور کہا، “سندھ جو ثقافتی ڏينهن مبارڪ هجي،” جو سندھ کی ثقافت سے ان کی عقیدت اور احترام کی عکاسی کرتا ہے۔
قونصل جنرل اور ان کی ٹیم نے سندھی ٹوپیاں اور اجرک اوڑھ کر اس دن کو منایا، جس سے ان کی یکجہتی کا مظاہرہ ہوا۔ اربم نے اپنے پیغام میں کہا:
“سندھ کلچر ڈے پر ہم اس زمین کی شاندار وراثت کا جشن مناتے ہیں، جو صوفیوں، شعرا، اور اولیاء کی سرزمین کے طور پر مشہور ہے۔ سندھ ہمیشہ سے برداشت اور شمولیت کی علامت رہا ہے۔”
امریکی قونصل خانے نے اپنے سوشل میڈیا پلیٹ فارمز پر بھی سندھ کلچر ڈے کی مبارکباد دیتے ہوئے لکھا:
“یہ وقت ہے کہ ہم سندھ کی شاندار روایات کو خراج تحسین پیش کریں، جو صوفیوں، شاعروں، اور اولیاء سے نسل در نسل متاثر رہی ہے۔ سندھ کے صوفیانہ خیالات سے لے کر ثقافتی اور مذہبی تنوع کا احترام کرنے تک، یہ صوبہ اتحاد، شمولیت، اور برداشت کی علامت ہے۔ ہم فخر کے ساتھ اس دن پر سندھ اور پاکستان کے عوام کو امن، خوشحالی، اور خوشی کی دعا دیتے ہیں۔”
قونصل خانے نے اپنے پیغام میں لوگوں کو سندھ کی ثقافت کے پسندیدہ پہلوؤں کو شیئر کرنے کی دعوت دی، تاکہ اس علاقے کی تنوع کو سراہا جا سکے۔
سندھ کلچر ڈے کی اہمیت
ہر سال دسمبر کے پہلے اتوار کو منایا جانے والا سندھ کلچر ڈے صوبے کی صدیوں پرانی روایات کو اجاگر کرتا ہے۔ دنیا بھر کے سندھی اس دن کو سندھی ٹوپیاں اور اجرک پہن کر مناتے ہیں، جو ان کی ثقافت کے لیے محبت اور فخر کی علامت ہیں۔
سندھ کے گورنر کامران خان ٹیسوری نے بھی صوبے کے عوام کو مبارکباد پیش کی اور اس دن کو سندھ کی شاندار تاریخ اور وراثت کی اہمیت کا اعتراف قرار دیا۔
