ٹرمپ کا بڑا اقدام! شوبزنس ٹکٹ مافیا کے خلاف کارروائی، مداحوں کو لوٹنے کا سلسلہ بند ہوگا
رپورٹ: راجہ زاہد اختر خانزادہ
ٹیکساس :امریکی صدر ڈونلڈ ٹرمپ نے ٹکٹوں کی بلیک مارکیٹنگ اور اضافی قیمتوں کے خلاف بڑا قدم اٹھاتے ہوئے ایک ایگزیکٹو آرڈر پر دستخط کر دیے ہیں، جس کے تحت کنسرٹس اور دیگر ایونٹس کے ٹکٹوں کی قیمتوں میں شفافیت لائی جائے گی اور مصنوعی طور پر قیمتیں بڑھانے والوں کے خلاف کارروائی ہوگی۔ اس موقع پر معروف گلوکار اور ٹرمپ کے دیرینہ حامی کڈ راک بھی وائٹ ہاؤس میں موجود تھے، جنہوں نے اس فیصلے کو “مداحوں کے لیے بڑی جیت” قرار دیا صدر ٹرمپ کا کہنا تھا کہ آج کے دور میں مداحوں کو اپنے پسندیدہ گلوکاروں اور فنکاروں کے کنسرٹس دیکھنے کے لیے غیر ضروری اور اضافی فیسیں ادا کرنی پڑتی ہیں، جو کہ ناقابل قبول ہے۔ انہوں نے کہا کہ “ٹکٹوں کے نرخ وقت کے ساتھ ساتھ ناقابل برداشت حد تک بڑھ چکے ہیں، اور اب وقت آ گیا ہے کہ اس مافیا کو روکا جائے۔ کڈ راک، جو ایک سرخ چمکدار سوٹ میں امریکی پرچم کے ڈیزائن کے ساتھ وائٹ ہاؤس پہنچے، نے کہا کہ آج کے دور میں ٹکٹ خریدنا ایک بڑا مسئلہ بن چکا ہے۔ انہوں نے کہا، “اگر آپ $100 کا ٹکٹ خریدتے ہیں، تو چیک آؤٹ تک یہ $170 کا ہو چکا ہوتا ہے، اور آپ کو معلوم نہیں ہوتا کہ اضافی فیسیں کیوں اور کہاں جا رہی ہیں۔ اس کے علاوہ، بوٹس اور مڈل مین سسٹم میں مداخلت کر کے تمام اچھے ٹکٹ خرید لیتے ہیں اور انہیں 400 سے 500 فیصد زیادہ قیمت پر فروخت کرتے ہیں۔ یہ سراسر ناانصافی ہے! اس ایگزیکٹو آرڈر کے تحت اٹارنی جنرل اور سیکریٹری خزانہ کو ہدایت دی گئی ہے کہ وہ ٹکٹوں کی دوبارہ فروخت پر لاگو تمام ٹیکس قوانین پر سختی سے عمل درآمد یقینی بنائیں۔ اس کے علاوہ، فیڈرل ٹریڈ کمیشن (FTC) کو ہدایت دی گئی ہے کہ وہ اس بات کو یقینی بنائے کہ ٹکٹوں کی خریداری کے ہر مرحلے پر قیمتوں میں شفافیت ہو، اور ان عناصر کے خلاف کارروائی کی جائے جو غیر منصفانہ، دھوکہ دہی پر مبنی اور غیر مسابقتی طریقوں سے مارکیٹ پر قبضہ جمائے بیٹھے ہیں یہ اقدام صرف امریکی موسیقی اور تفریحی صنعت تک محدود نہیں بلکہ اس کے اثرات بین الاقوامی سطح پر بھی محسوس کیے جائیں گے، خاص طور پر جنوبی ایشیائی کمیونٹی کے مداحوں اور بالی وڈ فلموں کے اسٹارز کے کنسرٹس پر بھی اس کا اثر پڑے گا۔ حالیہ برسوں میں، امریکہ میں ہونے والے بالی وڈ کنسرٹس کے ٹکٹوں کی قیمتیں آسمان کو چھو رہی تھیں، اور پاکستانی و بھارتی کمیونٹی کے مداح ان کی خریداری میں شدید مشکلات کا شکار تھے۔ یہ ایگزیکٹو آرڈر اس کمیونٹی کے لیے ایک بڑی خوشخبری ہے، کیونکہ اس کے تحت بالی وڈ اور جنوبی ایشیائی فنکاروں کے کنسرٹس کے ٹکٹوں کی غیر ضروری مہنگائی روکی جا سکے گی۔ اس کا مطلب یہ ہوگا کہ اب عام مداحوں کو اپنی پسندیدہ فلمی شخصیات جیسے سلمان خان، شاہ رخ خان، ارجیت سنگھ یا عاطف اسلم کے کنسرٹس کے ٹکٹ مناسب قیمتوں میں مل سکیں گے، اور ٹکٹوں کی غیر قانونی دوبارہ فروخت کرنے والے دلالوں کا دھندہ متاثر ہوگا۔ وائٹ ہاؤس کی جاری کردہ ایک رپورٹ کے مطابق، امریکی تفریحی صنعت کا سالانہ معاشی اثر 132.6 بلین ڈالر ہے اور یہ تقریباً 9 لاکھ سے زائد ملازمتیں فراہم کرتی ہے، مگر اس صنعت کو کچھ مفاد پرست عناصر نے لوٹ مار کا ذریعہ بنا رکھا ہے۔ اس نئے حکم کے بعد، یہ امید کی جا رہی ہے کہ ٹکٹوں کی قیمتیں اعتدال پر آ جائیں گی اور مداحوں کو معیاری تفریح کم خرچ میں دستیاب ہو گی۔ ٹرمپ نے اس موقع پر کہا، “یہ فیصلہ امریکی عوام کے مفاد میں ہے، اور ہم ہر ممکن کوشش کریں گے کہ کسی کو ناجائز منافع خوری کی اجازت نہ دی جائے۔” ان کے اس اقدام کو کئی فنکاروں اور مداحوں نے سراہا ہے، جبکہ کچھ بڑی ٹکٹنگ کمپنیاں اس فیصلے پر تحفظات کا اظہار کر رہی ہیں۔ یہ دیکھنا باقی ہے کہ یہ نیا قانون کس حد تک کامیاب ہوگا، اور کیا ٹکٹ مافیا واقعی کنٹرول میں آئے گا؟ لیکن ایک بات طے ہے کہ اب امریکی شائقین سمیت جنوبی ایشیائی کمیونٹی کے لوگ بھی اپنے پسندیدہ فنکاروں کو زیادہ مناسب قیمت پر دیکھ سکیں گے، جو کہ ایک بہت بڑی تبدیلی ہے۔
https://www.instagram.com/reel/DH4Vyy4u2RA/?igsh=NzZzdjJ2dWRwZmVi
