اوکلاہوما میں پاکستانی ڈاکٹروں کی تنظیم ‘اپنا’ کے تین روزہ اسپرنگ کنونشن کا آغاز
رپورٹ: راجہ زاہد اختر خانزادہ
اوکلاہوما: پاکستانی نژاد امریکی ڈاکٹروں کی تنظیم ‘اپنا’ (APPNA) کے تین روزہ اسپرنگ کنونشن کا آغاز آج اوکلاہوما میں ہو گیا۔ کنونشن کے پہلے دن ‘اپنا’ کے عہدیداروں کو ریاستی اسمبلی اور سینیٹ کے مشترکہ اجلاس میں مدعو کیا گیا، جہاں انہیں پاکستانی ڈاکٹروں کی خدمات کے اعتراف میں خراجِ تحسین پیش کیا گیا اور اسناد سے نوازا گیا۔
آج پہلے روز اوکلوہاما کی ریاستی اسمبلی میں ‘اپنا’ کی زبردست پذیرائی ہوئی، اپنا’ 2025 کی صدر، ڈاکٹر حمیرا قمر کی قیادت میں وفد نے ریاستی اسمبلی کے خصوصی اجلاس میں شرکت کی، جس میں ڈاکٹر حسن کریم، ڈاکٹر ثناءاللہ، ڈاکٹر کلیم، ڈاکٹر افضل، اکبر کرسی، ڈاکٹر ہارون درانی (سابق صدر)، ڈاکٹر فضل علی، ڈاکٹر محمد ثناءاللہ (چیئرمین ہوسٹ کمیٹی) اور ڈاکٹر حسان بھی شامل تھے۔ ریاستی اسمبلی کے اراکین برائن ہل اور نیل ہیز نے پاکستانی ڈاکٹروں کی امریکہ میں دی جانے والی خدمات کو سراہتے ہوئے کہا کہ ان کی محنت اور پیشہ ورانہ مہارت امریکی معاشرے کے لیے ایک قیمتی اثاثہ ہے۔ انہوں نے ‘اپنا’ کے کنونشن کا خیرمقدم کرتے ہوئے پاکستانی ڈاکٹروں کے کردار کو قابلِ ستائش قرار دیا۔
اپنا کی صدر ڈاکٹر حمیرا قمر نے اس موقع پر ریاستی اسمبلی میں بتایا کہ ‘اپنا’ امریکہ بھر میں 54 چیپٹرز کے ذریعے صحت عامہ کے فروغ کے لیے کام کر رہی ہے، جبکہ چار چیپٹرز کینڈا میں سرگرم ہیں۔ ان کا کہنا تھا کہ پاکستانی نژاد ڈاکٹرز امریکی عوام کو معیاری علاج معالجہ فراہم کرنے میں اہم کردار ادا کر رہے ہیں۔ انہوں نے تمام نمائندوں کو کنونشن میں شرکت کی دعوت دی اور کہا کہ وہ دیسی کھانوں اور پاکستانی ثقافت سے لطف اندوز ہو سکتے ہیں۔ انہوں نے اس بات پر بھی خوشی کا اظہار کیا کہ رواں سال امریکہ بھر میں ایک ہزار سے زائد پاکستانی ڈاکٹرز مختلف اسپتالوں میں ریزیڈینسی پروگرام (میچ) کے لیے منتخب ہوئے ہیں، جو پاکستان کے طبی تعلیمی اداروں کی اعلیٰ معیار کی تربیت کا ثبوت ہے۔ اس موقع پر اپنا کے ڈاکٹر کلیم نے بتایا کہ اوکلاہوما میں 200 سے زائد پاکستانی ڈاکٹرز خدمات انجام دے رہے ہیں اور اس کنونشن میں تقریباً 1000 ڈاکٹرز کی شرکت متوقع ہے۔ کنونشن کے دوران پاکستانی ڈاکٹروں کے وفد نے ریاستی اسمبلی کا دورہ بھی کیا اور کئی اراکینِ اسمبلی و سینیٹ سے ملاقاتیں کیں۔
واضع رہے کہ یہ کنونشن ڈاکٹر حمیرا قمر کی صدارت میں منعقد ہونے والا ‘اپنا’ کا پہلا بڑا ایونٹ ہے، جس میں سماجی و تفریحی سرگرمیاں بھی شامل ہیں۔ اس کنونشن کے دوران مشہور بھارتی گلوکار میکا سنگھ کل خصوصی پرفارمنس دیں گے، جو شرکاء کے لیے ایک خاص تفریحی موقع ہوگا۔
کنونشن تین روز تک جاری رہے گا، جس میں طبی، سماجی اور تفریحی سرگرمیاں شامل ہوں گی۔
