نئی دہلی: ایک حالیہ سروے میں انکشاف ہوا ہے کہ زیادہ سے زیادہ بھارتی شہری اپنی زندگی کے معیار کے بارے میں کم پر امید ہوتے جا رہے ہیں۔ اس کی بڑی وجہ جمود کا شکار اجرتیں اور بڑھتی ہوئی مہنگائی ہے، جو مستقبل کے امکانات کو دھندلا رہی ہے۔ یہ وزیر اعظم نریندر مودی کے لیے تشویشناک خبر ہے، خاص طور پر سالانہ بجٹ سے چند روز قبل۔
بدھ کے روز پولنگ ایجنسی سی-ووٹَر کے جاری کردہ نتائج کے مطابق، 37 فیصد سے زائد جواب دہندگان کا ماننا ہے کہ عام شہریوں کے لیے اگلے سال زندگی کا معیار مزید خراب ہو جائے گا، جو 2013 کے بعد سب سے بلند شرح ہے۔ مودی 2014 سے وزیر اعظم کے عہدے پر فائز ہیں۔
یہ سروے 5,269 بالغ افراد سے مختلف بھارتی ریاستوں میں کیا گیا۔
مسلسل بڑھتی ہوئی خوراک کی مہنگائی نے گھریلو بجٹ کو بری طرح متاثر کیا ہے اور قوت خرید کم کر دی ہے، جبکہ دنیا کی پانچویں سب سے بڑی معیشت کو اگلے چار سال میں اپنی سب سے کم شرح نمو کا سامنا کرنے کی توقع ہے۔
تقریباً دو تہائی افراد کا کہنا تھا کہ مودی کے اقتدار میں آنے کے بعد مہنگائی پر قابو نہیں پایا جا سکا، اور اشیاء کی قیمتوں میں نمایاں اضافہ ہوا ہے۔ نصف سے زیادہ جواب دہندگان نے مہنگائی کو اپنی زندگی کے معیار پر منفی اثر ڈالنے والا عنصر قرار دیا۔
آئندہ سالانہ بجٹ میں، مودی سے توقع کی جا رہی ہے کہ وہ معیشت کی ترقی کو فروغ دینے، عوام کی آمدنی بڑھانے اور درمیانے طبقے کے مالی دباؤ کو کم کرنے کے لیے نئے اقدامات کا اعلان کریں گے۔
تقریباً آدھے افراد کا کہنا تھا کہ ان کی ذاتی آمدنی گزشتہ سال میں جوں کی توں رہی، جبکہ اخراجات میں نمایاں اضافہ ہوا۔ مزید یہ کہ تقریباً دو تہائی افراد نے اعتراف کیا کہ بڑھتے ہوئے اخراجات کو سنبھالنا مشکل ہوتا جا رہا ہے۔
اگرچہ بھارت کو دنیا کی تیزی سے ترقی کرتی ہوئی معیشت کہا جا رہا ہے، لیکن اس کی مزدوری کی منڈی اب بھی نوجوانوں کو مستحکم نوکریاں دینے میں ناکام نظر آ رہی ہے۔
پچھلے بجٹ میں، بھارت نے 24 ارب ڈالر مختلف روزگار اسکیموں پر خرچ کرنے کے لیے مختص کیے تھے۔ تاہم، ان پروگراموں کو اب تک نافذ نہیں کیا جا سکا، کیونکہ ان کی تفصیلات پر تاحال بحث جاری ہے۔
