نیلم کوٹھاری سونی سے غیر متوقع سوال پر حیرت، حاضرین کے قہقہے گونج اٹھے
رپورٹ: راجہ زاہد اختر خانزادہ
ڈیلس:بھارتی فلم اور ٹی وی کی معروف اداکارہ اور نیٹ فلکس کے مشہور رئیلٹی شو کی ہوسٹ نیلم کوٹھاری سونی کو امریکہ کے شہر ڈیلس میں جیو نیوز اور جنگ کے نمائندے راجہ زاہد اختر خانزادہ نے ایک ایسا سوال کر دیا جس نے لمحہ بھر کے لیے ماحول کو حیرت اور قہقہوں سے بھر دیا۔
ایونٹ کے دوران جب نیلم کوٹھاری سونی سے سوال کیا گیا کہ:
“1998 میں فلم ’ہم ساتھ ساتھ ہیں‘ کی شوٹنگ کے دوران آپ پر ساتھی اداکاروں سلمان خان، سیف علی خان، سونالی بیندرے اور تبو کے ساتھ کنکنی میں دو کالے ہرنوں کے غیر قانونی شکار کا الزام عائد کیا گیا تھا۔ 5 اپریل 2018 کو جودھپور کی سی جے ایم عدالت نے آپ کو بری کر دیا۔ اس تجربے نے آپ کی ذاتی اور پیشہ ورانہ زندگی کو کس طرح متاثر کیا، اور آپ نے اس مشکل وقت سے کیا سبق سیکھا؟”
یہ سن کر نیلم کوٹھاری پہلے حیران ہوئیں اور ہلکے پھلکے انداز میں کہا:
“بھائی صاحب، یہ ماحول…!”
یہ جملہ سنتے ہی حاضرین ہنس پڑے، جس پر انہوں نے مسکراتے ہوئے مزید کہا:
“اچھا سوال ہے، لیکن شاید یہ موقع مناسب نہیں ہے۔”
بعدازاں، انہوں نے خوش اخلاقی سے صحافی کے ساتھ تصویر بنواتے ہوئے معذرت کی اور کہا:
“معاف کیجیے گا، میں آپ کے سوال کا جواب نہیں دے سکی۔”
اس پر صحافی نے مسکراتے ہوئے کہا:
“ہم سوالات کے ذریعے خبر نکالتے ہیں اور سوال کرنا ہمارا کام ہے، جبکہ جواب دینا یا نہ دینا آپ کی مرضی پر منحصر ہوتا ہے۔”
یہ لمحہ ایونٹ کا یادگار حصہ بن گیا اور نیلم کوٹھاری کی خوش مزاجی اور پیشہ ورانہ رویے نے حاضرین کا دل جیت لیا۔
