ساؤتھ وارک کراؤن کورٹ میں جج نے کرائم پراسیکیوشن سروس (سی پی ایس) سے سنا کہ سابق وزیر اعظم نواز شریف کے پوتے زکریا شریف کو یہ خوف دلایا گیا تھا کہ پی ٹی آئی کے حامی گلفام حسین ایون فیلڈ فلیٹس پر ان کے خلاف تشدد کا استعمال کریں گے۔
گلفام کراؤن کورٹ کے جج کے سامنے پیش ہوئے، جہاں پراسیکیوشن نے جج کو کیس کی مکمل تفصیلات پڑھ کر سنائیں۔
کنگ بمقابلہ گلفام کیس میں، جج کو بتایا گیا کہ حسین پر ہراسانی کے ذریعے کسی شخص کو تشدد کے خوف میں مبتلا کرنے کا الزام عائد کیا گیا ہے، جو کہ پروٹیکشن فرام ہراسمنٹ ایکٹ 1997 کی سیکشن 4(1) کی خلاف ورزی ہے۔
چارج شیٹ میں لکھا ہے: “گلفام حسین نے 22 نومبر 2024 اور 12 اپریل 2025 کے درمیان زکریا شریف کو اس کے طرز عمل سے تشدد کے خوف میں مبتلا کیا، جسے وہ جانتا تھا یا اسے جاننا چاہیے تھا کہ وہ ہر موقع پر زکریا شریف کو تشدد کا خوف دلائے گا، اس نے اس کے گھر کے باہر اس اور اس کے خاندان کے لیے دھمکی آمیز پیغامات ریکارڈ کیے اور ان کی جائیداد کے سامنے والے دروازے پر پتھر پھینکے۔”
جج نے اعلان کیا کہ مقدمے کی سماعت جون 2027 میں ہوگی۔ تب تک، انہوں نے کہا کہ گلفام کی الیکٹرانک ٹیگ کے ذریعے نگرانی کی جائے گی۔ انہوں نے حسین کو بتایا کہ وہ پارک لین فلیٹس کے قریب جانے سے بدستور منع ہیں۔
پولیس کو اصل شکایت خرم بٹ نے کی تھی، جو پی ایم ایل-این یو کے یوتھ ونگ کے رہنما ہیں اور وہ بھی عدالت میں موجود تھے۔ جج کی جانب سے الزامات کے بارے میں پوچھے جانے پر، گلفام نے الزامات کی تردید کی اور قصوروار نہ ٹھہرنے کی درخواست کی۔
اس سال جنوری میں، پی ٹی آئی کے کارکن کو سکاٹ لینڈ یارڈ نے گرفتار کیا اور ضمانت پر رہا کر دیا گیا، لیکن شریف خاندان کے افراد جہاں رہتے ہیں، ایون فیلڈ فلیٹس کے قریب جانے سے منع کر دیا گیا۔
گلفام، جو گزشتہ سال پی ٹی آئی میں شمولیت اختیار کرنے سے قبل مسلم لیگ ن میں تھے، کو 17 جنوری کو پولیس نے وزیر اعظم شہباز شریف، سابق وزیر اعظم نواز شریف اور شریف خاندان کے دیگر افراد کو نقصان پہنچانے کی دھمکی دینے کے الزام میں گرفتار کیا تھا، جس میں ٹک ٹاک پر لائیو پارک لین فلیٹس کو اڑانے کی دھمکی بھی شامل تھی۔
گلفام نے کہا کہ وہ اپنے اقدامات کا دفاع کریں گے اور اس کیس کے خلاف لڑتے رہیں گے۔ انہوں نے الزام لگایا کہ بٹ نے خفیہ طور پر ان کی فلم بنائی اور ثبوت پولیس کو فراہم کیے۔ بٹ نے کہا کہ وہ مقدمے کی سماعت کے دوران استغاثہ کے گواہ کے طور پر پیش ہوں گے۔
