سعودی وزارت داخلہ نے حج 2025 کی تیاریوں کے سلسلے میں عازمین حج کی حفاظت اور سلامتی کو یقینی بنانے کے لیے کچھ نئے طریقہ کار اور رہنما اصول جاری کیے ہیں۔
اتوار کو جاری ہونے والی ایک اطلاع کے مطابق، وزارت نے بتایا کہ عمرہ کرنے والوں کے لیے مملکت میں داخل ہونے کی آخری تاریخ اتوار، 13 اپریل 2025 ہوگی، جبکہ واپسی کی آخری مجاز تاریخ منگل، 29 اپریل 2025 ہے۔
سعودی عرب کی وزارت داخلہ کی جانب سے جاری کردہ اطلاع، 13 اپریل 2025۔ — X/@MOISaudiArabia
وزارت نے خبردار کیا کہ اس تاریخ تک واپس نہ لوٹنے کو ضوابط کی خلاف ورزی تصور کیا جائے گا۔
بدھ، 23 اپریل 2025 سے مکہ مکرمہ میں داخلے کو سختی سے منظم کیا جائے گا۔ مقدس شہر میں داخل ہونے کے خواہشمند افراد کو درج ذیل میں سے کوئی ایک چیز پیش کرنا ہوگی: ایک درست ورک پرمٹ، مکہ سے جاری کردہ رہائشی شناختی کارڈ، یا ایک درست حج پرمٹ۔
مملکت کے دیگر حصوں میں مقیم غیر ملکی باشندوں کو مکہ میں داخل ہونے کی اجازت نہیں ہوگی جب تک کہ وہ مناسب اجازت نامہ حاصل نہ کرلیں۔ بیان میں کہا گیا ہے کہ بغیر اجازت داخل ہونے کی کوشش کرنے والے خلاف ورزی کرنے والوں کو الشمیسی یا دیگر چوکیوں سے واپس بھیج دیا جائے گا۔
وزارت نے 29 اپریل سے 10 جون 2025 تک “نسک” پلیٹ فارم کے ذریعے عمرہ پرمٹ جاری کرنے پر بھی عارضی پابندی کا اعلان کیا ہے۔
مزید براں، سرکاری حج ویزا کے علاوہ کسی بھی قسم کا ویزا رکھنے والے افراد کو 29 اپریل سے مکہ میں داخل ہونے یا قیام کرنے کی اجازت نہیں ہوگی۔
رہنما اصولوں میں بتایا گیا ہے کہ غیر ملکی شہری جنہیں روزگار کے مقاصد کے لیے مکہ مکرمہ یا اس کے گردونواح کے مقدس مقامات میں داخل ہونے کی ضرورت ہے، انہیں متعلقہ پورٹلز کے ذریعے سفری اجازت نامے کے لیے درخواست دینا ہوگی۔
