پاکستان کی جانب سے چینی لڑاکا طیارے، J-10C، کے کامیاب استعمال کے بعد، چینی سرکاری ٹی وی نے ایک دستاویزی فلم نشر کی ہے جس میں چین نے اپنے جدید لڑاکا طیارے کے آغاز اور کامیابیوں کو نمایاں کیا ہے۔ دستاویزی فلم میں کہا گیا ہے کہ حالیہ پاک بھارت کشیدگی کے دوران، پاکستان نے اس طیارے کی مدد سے ہندوستانی لڑاکا طیارے مار گرائے۔
چینی سرکاری ٹی وی CCTV پر نشر ہونے والی یہ دستاویزی فلم ایسے وقت میں سامنے آئی ہے جب پاکستان ایئر فورس نے 7 مئی کو ہندوستانی فضائیہ کے ساتھ ایک فضائی جھڑپ میں J-10C طیارے استعمال کیے، جس میں تین ہندوستانی رافیل طیارے اور دیگر لڑاکا طیارے تباہ ہوئے۔ چینی ٹی وی کی ایک فوجی رپورٹ نے ہفتہ کو کہا کہ J-10CE، جو J-10C کا برآمدی ورژن ہے، “نے حال ہی میں ایک حقیقی جنگ میں غیر ملکی طیارے مار گرائے، اور یہ اس طیارے کی پہلی جنگی کامیابی ہے۔”
7 مئی کو وزیر خارجہ اسحاق ڈار نے قانون سازوں کو بتایا تھا کہ تین فرانسیسی رافیل لڑاکا طیارے اور دیگر ہندوستانی لڑاکا طیارے J-10C طیاروں کے ذریعے مار گرائے گئے تھے۔ ایک فرانسیسی اہلکار نے جنگ میں ایک ہندوستانی زیر استعمال رافیل کے نقصان کی تصدیق کی، تاہم نئی دہلی نے اس رپورٹ کی تصدیق سے گریز کیا۔ کشمیر میں ہونے والی جھڑپ کے براہ راست حوالے سے، CCTV پر فوجی پروگرام میں کہا گیا کہ J-10CE نے جنگ میں ایک بھی طیارہ کھوئے بغیر چند غیر ملکی طیارے مار گرائے تھے۔
J-10C: 4.5 جنریشن لڑاکا طیارے کی ابتدا
چینی دستاویزی فلم کے مطابق، J-10 کی ترقی 1980 کی دہائی میں شروع ہوئی جب چین نے محسوس کیا کہ اس کے طیارے امریکی اور سوویت ٹیکنالوجی سے ایک نسل پیچھے ہیں۔ ایک نئے قسم کے لڑاکا طیارے کا ڈیزائن 1982 میں سونگ وین کانگ نے بنایا، جو 611 انسٹی ٹیوٹ کے مرکزی ڈیزائنر تھے، جسے اب چینگدو ایئر کرافٹ انڈسٹری گروپ کے نام سے جانا جاتا ہے۔ دستاویزی فلم کا دعویٰ ہے کہ چینی ہوا بازی کے ماہرین نے پہلے سے موجود ماڈلز یا بلیو پرنٹس کا استعمال کیے بغیر تکنیکی پیشرفت حاصل کرنے کے لیے “انتہائی مشکل چیلنجوں” پر قابو پایا۔
J-10 کا پہلا ماڈل 1997 میں مکمل ہوا، جسے چینی ماہرین نے “فضائی دفاع کی تاریخ میں ایک معجزہ” قرار دیا۔ J-10C ایک سنگل انجن، کثیر المقاصد لڑاکا طیارہ ہے جو جدید ایکٹیو الیکٹرانکلی اسکین ایرے (AESA) ریڈار، کم ریڈار کراس سیکشن، جدید ایویونکس اور طویل فاصلے تک مار کرنے والے PL-15 میزائلوں سے لیس ہے۔ اس طیارے کو 2003 میں چین کی فضائیہ میں شامل کیا گیا، جبکہ اس کا سب سے جدید ورژن پاکستان کو برآمد کیا گیا۔
چینی اخبار گلوبل ٹائمز نے فوجی امور کے ماہر ژانگ ژوئیفینگ کے حوالے سے کہا کہ “J-10 کی ترقی کے ذریعے، چین نے لڑاکا طیاروں کے لیے جدید ایرو ڈائنامک کنفیگریشن ٹیکنالوجیز میں مہارت حاصل کی ہے، فلائٹ کنٹرول سسٹمز میں کامیابیاں حاصل کی ہیں اور جدید ٹربوفین انجنوں کی ترقی کو فروغ دیا ہے۔”
عالمی نمائش میں نمایاں مقام
J-10C طیارہ اس وقت ملائیشیا میں جاری لانگکاوی انٹرنیشنل میری ٹائم اینڈ ایرو اسپیس نمائش میں بھی نمائش کے لیے پیش کیا گیا ہے، جہاں اس کی جدید ٹیکنالوجی اور جنگی صلاحیتوں کو بین الاقوامی سطح پر سراہا جا رہا ہے۔ چین اس وقت پاکستان کا سب سے بڑا ہتھیار فراہم کنندہ ہے، جو 2020 سے 2024 تک پاکستان کے دفاعی درآمدات کا 81% حصہ ہے۔ پاکستان نہ صرف J-10C بلکہ PL-15 میزائل اور JF-17 تھنڈر لڑاکا طیارے بھی چین سے خریدتا ہے۔
