چیئرمین جوائنٹ چیفس آف اسٹاف کمیٹی (CJCSC) جنرل ساحر شمشاد مرزا نے مملکت سعودی عرب کا سرکاری دورہ کیا، جہاں انہوں نے پاکستان-سعودی عرب جوائنٹ ملٹری کوآپریشن کمیٹی (JMCC) کے آٹھویں اجلاس میں شرکت کی۔
اس دوران انہوں نے سعودی عرب کے اسسٹنٹ وزیر دفاع میجر جنرل طلال بن عبداللہ العتیبی اور سعودی عرب کے چیف آف جنرل اسٹاف جنرل فیاض بن حامد الرویلی سے ملاقات کی۔
ملاقاتوں میں اسٹریٹیجک اور سیکیورٹی امور، خطے کی بدلتی صورتحال، اور دوطرفہ دفاعی تعاون کو مزید مستحکم کرنے پر تبادلہ خیال کیا گیا۔
JMCC اجلاس کی مشترکہ صدارت جنرل ساحر شمشاد مرزا اور جنرل فیاض بن حامد الرویلی نے کی، جس میں دونوں ممالک کی افواج کے درمیان جاری تعاون کا جائزہ لیا گیا۔
بات چیت میں باہمی تبادلہ پروگرامز، تربیتی منصوبے، اور دیگر دفاعی سرگرمیوں پر غور کیا گیا۔
فوجی قیادت نے دفاع اور سیکیورٹی تعاون کو مزید فروغ دینے کے عزم کا اعادہ کیا۔
سعودی عسکری قیادت نے پاکستان کی مسلح افواج کی پیشہ ورانہ مہارت کو سراہا اور دہشت گردی کے خلاف ان کی بے پناہ قربانیوں کا اعتراف کیا۔
آرمی فورسز ہیڈکوارٹرز پہنچنے پر، جنرل ساحر شمشاد مرزا کو ایک چاق و چوبند فوجی دستے نے “گارڈ آف آنر” پیش کیا۔
