راولپنڈی: حکومت نے پاکستان انٹرنیشنل ایئر لائنز(پی آئی اے) اور سعودی عریبین ایئرلائنز کی 16 خصوصی پروازوں کے ذریعے یکم تا 10 جون تک سعودی عرب میں پھنسے 3 ہزار سے زائد پاکستانیوں کو وطن واپسی لانے کا فیصلہ کیا ہے۔
اس کے ساتھ ہی حکومت نے اندرونِ ملک پروازوں کے آپریشن کو بھی 20 سے 22 فیصد تک بڑھانے کا فیصلہ کیا جو کورونا وائرس کی وبا سے قبل 40 سے 45 فیصد تھا۔
ایوی ایشن ڈویژن نے کہا کہ مذکورہ فیصلہ وفاقی اور صوبائی حکومتوں کی جانب سے اسمارٹ لاک ڈاؤن اور فضائی سروس کے لیے بڑھتی ہوئی طلب کے تناظر میں کیا گیا۔
ڈویژن نے کہا کہ یہ فیصلہ ایئرپورٹس پر اور ایئرلائنز کی جانب سے طبی احتیاطی تدابیر کے باعث لوگوں کے اعتماد کا نتیجہ ہے۔
یہ فلائٹ آپریشن یکم جون سے اسلام آباد، لاہور، کراچی، پشاور اور کوئٹہ سے شروع ہوگا۔
بیرون ملک پھنسے پاکستانیوں کی وطن واپسی کے حکومت کے منصوبے کے بعد پی آئی اے اور سعودی عریبین ایئرلائنز نے 16 پروازیں چلانے کا فیصلہ کیا۔
شیڈول کے مطابق یہ پروازیں یکم سے 10 جون تک اسلام آباد، کراچی، لاہور، ملتان اور پشاور ایئرپورٹس پر لینڈ کریں گی۔
حکام کے مطابق شیڈول میں پی آئی اے کی 9 اور سعودی عریبین ایئرلائنز کی 7 پروازیں شامل ہیں۔
سعودی عریبین ایئرلائنز کی پہلی پرواز مسافروں کو پشاور کے باچا خان ایئرپورٹ پر لائے گی جبکہ پی آئی اے کی پروازیں 2 اور 3 جون کو ملتان ایئرپورٹ پر لینڈ کریں گی۔
3 جون کو سعودی عریبین ایئرلائنز کی 2 پروازیں کراچی ایئرپورٹ جبکہ ایک باچا خان ایئرپورٹ پر لینڈ کرے گی۔
سعودی عریبین ایئرلائنز کی پرواز 4 جون کو اسلام آباد ایئرپورٹ پر مسافروں کو واپس لائے گی جبکہ اسی ایئرلائن کی پرواز 5 جون کو مسافروں کو سعودی عرب سے کراچی لائے گی۔
6 جون کو پی آئی اے کی پرواز پشاور کے باچا خان ایئرپورٹ پہنچے گی جبکہ 7 جون کو سعودی عریبین ایئرلائن کی پرواز کراچی پہنچے گی۔
علاوہ ازیں 8 جون کو پی آئی کی 3 علیحدہ پروازیں لاہور، ملتان اور پشاور ایئرپورٹس پر لینڈ کریں گی۔
9 جون ب کو سعودی عریبین ایئرلائنز کی پرواز سعودی عرب سے لاہور کے لیے اڑان بھرے گی جبکہ پی آئی اے کی پرواز اسی روز ملتان پہنچے گی۔
سعودی عرب سے پی آئی اے کی پرواز 10 جون کو کراچی ایئرپورٹ جبکہ ایک اور پرواز ملتان ایئرپورٹ پر لینڈ کرے گی۔
