کراچی:
ویلیوایڈڈ ٹیکسٹائل سیکٹر کے باخبر ذرائع نے ایکسپریس کوبتایا کہ جنوری 2019 سےجنوری2020 کے دوران کراچی کی ویلیوایڈڈ ٹیکسٹائل سیکٹر کی صنعتوں کو 99 دن گیس فراہم نہیں کی گئی، 26 دن باقاعدہ نوٹیفکیشن جاری کرکے گیس کی لوڈشیڈنگ کی گئی جب کہ 73دن ان صنعتوں کو کم پریشر کے ساتھ گیس سپلائی کی گئی، ان عوامل کے سبب برآمدی مصنوعات کی پیداوار میں 27تا 30فیصد کی کمی واقع ہوئی۔
اس ضمن میں کراچی انڈسٹریل فورم کے سربراہ محمد جاوید بلوانی نے ایکسپریس کو بتایا کہ زیر تبصرہ مدت میں 12 دن گڈز ٹرانسپورٹرز کی بھی ہڑتال ہوئی جس کی وجہ سے برآمدی صنعتوں کو اپنے کنسائمنٹس کی تکمیل اور ترسیل میں 4 ماہ کی تاخیر کا نقصان اٹھانا پڑا ہے۔ انہوں نے بتایا کہ ویلیوایڈڈ ٹیکسٹائل سیکٹر کی صنعتوں کو گیس کی فراہمی عدم تسلسل کے باعث ان صنعتوں میں اوسطا ایک شفٹ تقریبا ختم ہوچکی ہے جس کے نتیجے میں ان صنعتوں میں یومیہ اجرت پر خدمات انجام دینے والے 30 فیصد ورکرز بے روزگارہوگئے ہیں۔
