پیساڈینا، کیلیفورنیا:
سائنسدانوں نے کم شدت والی الٹرا ساؤنڈ لہریں سرطان زدہ پھوڑوں (کینسر ٹیومر) پر مرکوز کرکے انہیں اس انداز سے ختم کرنے میں کامیابی حاصل کی ہے کہ آس پاس کے صحت مند خلیوں کو کچھ بھی نہیں ہوا۔
واضح رہے کہ الٹرا ساؤنڈ دراصل آواز ہی کی ایسی لہریں ہوتی ہیں جنہیں ہمارے کان نہیں سن سکتے۔ الٹرا ساؤنڈ سے کینسر ٹیومر کا خاتمہ بھی کوئی نہیں بات نہیں بلکہ یہ تکنیک بھی برسوں سے استعمال ہوتی آرہی ہے۔
البتہ، اب تک اس مقصد کےلیے زیادہ شدت والی الٹرا ساؤنڈ لہروں کو مرکوز (فوکس) کرکے استعمال کیا جاتا رہا ہے، جس کی وجہ سے کینسر ٹیومر کے ساتھ ساتھ آس پاس کے صحت مند خلیے بھی تباہ ہوجاتے ہیں۔ اس طرح کبھی کبھی مریض کو فائدہ ہونے کے بجائے اُلٹا نقصان ہی پہنچ جاتا ہے۔
انہوں نے یہ بھی نوٹ کیا کہ کم شدت والی الٹرا ساؤنڈ، صحت مند خلیوں کےلیے تو بے ضرر ہوتی ہے لیکن سرطانی رسولیوں (کینسر ٹیومرز) میں موجود خلیوں کو ان کی بعض اہم ظاہری خصوصیات کی بناء پر ہلاک کردیتی ہے۔
یہ جاننے کے بعد انہوں نے سرطان زدہ رسولیوں پر نئی تکنیک کے تجربات کیے جن میں خاطر خواہ کامیابیاں حاصل ہوئی۔ اس تحقیق کے نتائج ’’اپلائیڈ فزکس لیٹر‘‘ نامی ریسرچ جرنل کے تازہ شمارے میں شائع ہوئے ہیں۔
اب ان سائنسدانوں کا ارادہ ہے کہ کم شدت والی مرکوز الٹرا ساؤنڈ کو انسانوں میں موجود کینسر ٹیومرز کے خاتمے پر آزمایا جائے، جس کےلیے انہیں متعلقہ محکموں کی جانب سے اجازت لینا ہوگی۔
