پاک بحریہ کے جہاز پی این ایس اصلت نے انڈونیشیائی بحریہ کی جانب سے انڈونیشیا کے شہر بالی میں منعقدہ کثیر القومی بحری مشق کوموڈو-25 کے پانچویں ایڈیشن میں حصہ لیا۔
انٹر سروسز پبلک ریلیشنز (آئی ایس پی آر) کے ایک بیان کے مطابق، ‘امن اور استحکام کے لیے بحری شراکت داری’ کے موضوع پر مبنی اس مشق میں تقریباً 38 ممالک کی بحری افواج نے بحری تعاون کو بڑھانے اور علاقائی سلامتی کو مضبوط کرنے کے لیے شرکت کی۔
بیرون ملک تعیناتی (او ایس ڈی) پر موجود، پی این ایس اصلت کی فعال شرکت بین الاقوامی بحری تعاون اور علاقائی استحکام کے لیے پاک بحریہ کے عزم کو اجاگر کرتی ہے۔
اس مشق کا آغاز ایک شاندار فلیٹ ریویو سے ہوا، جہاں پی این ایس اصلت نے شریک ممالک کے جنگی جہازوں، ہیلی کاپٹروں اور طیاروں کے ساتھ مل کر بحری صلاحیتوں اور باہمی تعاون کا مظاہرہ کیا۔
پی این ایس اصلت نے کولمبو، سری لنکا میں بھی بندرگاہ پر قیام کیا۔ اس دورے کے دوران، جہاز کے کمانڈنگ آفیسر نے مغربی بحری علاقے کے کمانڈر اور سینئر فوجی حکام سے ملاقات کی، باہمی دلچسپی کے امور پر تبادلہ خیال کیا اور دوطرفہ تعلقات کی تصدیق کی۔ کمانڈنگ آفیسر نے چیف آف نیول اسٹاف ایڈمرل نوید اشرف کے نیک خواہشات کے پیغامات سری لنکن بحریہ اور اس کے عوام تک پہنچائے۔
