رمضان کے آغاز کے ساتھ ہی وفاقی دارالحکومت، پنجاب، خیبر پختونخوا اور بلوچستان میں بارش اور برفباری کی پیش گوئی کی گئی ہے، جبکہ سندھ کے بیشتر اضلاع میں موسم خشک رہنے کا امکان ہے۔
محکمہ موسمیات کے مطابق اسلام آباد، راولپنڈی، مری، گلیات اور گردونواح میں رات کے وقت تیز ہواؤں کے ساتھ بارش کا امکان ہے۔ اٹک، چکوال، جہلم، گجرات، حافظ آباد، گوجرانوالہ، فیصل آباد، جھنگ، ٹوبہ ٹیک سنگھ، ساہیوال، سرگودھا، خوشاب، میانوالی، بھکر، ملتان، ڈیرہ غازی خان، لیہ، راجن پور، رحیم یار خان اور کوٹ ادو میں بھی بارش کی توقع ہے۔
خیبر پختونخوا میں چترال، دیر، سوات، شانگلہ، مالاکنڈ، کوہستان، مانسہرہ، بٹگرام، ایبٹ آباد، ہری پور اور بونیر سمیت دیگر علاقوں میں بارش اور برفباری کا امکان ہے۔ باجوڑ، مہمند، خیبر، اورکزئی، کرم، وزیرستان، لکی مروت، ڈیرہ اسماعیل خان، پشاور اور چارسدہ میں بھی بارش کی پیش گوئی کی گئی ہے۔
بلوچستان میں بھی کوئٹہ، زیارت، چمن، مستونگ، پشین اور قلعہ عبداللہ سمیت دیگر اضلاع میں بارش اور برفباری کا امکان ہے۔
دریں اثنا، سندھ کے بیشتر حصوں میں موسم خشک رہنے کا امکان ہے۔
