سیکیورٹی فورسز اور قانون نافذ کرنے والے اداروں نے 2024 میں 59,775 انٹیلیجنس بیسڈ آپریشنز کیے، جو ملک کی جاری انسداد دہشت گردی کی کوششوں میں ایک بڑی کامیابی ہیں۔ ان کارروائیوں میں 925 دہشت گردوں کو ہلاک کیا گیا، جو پچھلے پانچ سالوں میں سب سے زیادہ سالانہ تعداد ہے۔
روزانہ کی بنیاد پر 169 آپریشنز کیے گئے، جن میں فوج، انٹیلیجنس اداروں، پولیس، اور دیگر قانون نافذ کرنے والے اداروں کے درمیان مربوط کوششیں شامل تھیں۔ ہلاک ہونے والوں میں 73 اہم اہداف اور 27 افغان نژاد غیر ملکی دہشت گرد شامل تھے۔
ان آپریشنز کے دوران غیر ملکی ساختہ ہتھیاروں اور گولہ بارود کی بڑی تعداد ضبط کی گئی۔ قانون نافذ کرنے والے اداروں نے بروقت کارروائیوں سے متعدد منصوبہ بند حملوں کو ناکام بناتے ہوئے دہشت گرد نیٹ ورکس کو ختم کیا۔
یہ کوششیں پاکستان کی طویل مدتی حکمت عملی کا تسلسل ہیں، جس میں ملک کے مختلف حصوں میں سیکیورٹی آپریشنز کیے گئے۔ ان کارروائیوں کے نتیجے میں دہشت گرد نیٹ ورکس کی شناخت اور خاتمے میں نمایاں کامیابی حاصل ہوئی۔
