کراچی : متحدہ عرب امارات (یو اے ای) کی ریئل اسٹیٹ کمپنیوں نے پاکستان میں 25 ارب ڈالر کی سرمایہ کاری کا اعلان کیا ہے۔
تفصیلات کے مطابق پاکستان کی تعمیراتی صنعت کی ترقی کے لیے اہم پیشرفت سامنے آئی ہے، متحدہ عرب امارات میں قائم ریئل اسٹیٹ کمپنیوں کا ایک پاکستانی کاروباری گروپ ایسوسی ایشن آف بلڈرز اینڈ ڈیولپرز آف پاکستان (آباد) کے ذریعے 20 سے 25 ارب ڈالر کی سرمایہ کاری کرے گا۔
اس بات کا اعلان متحدہ عرب امارات کی رئیل اسٹیٹ کمپنیوں کے ایک وفد نے کیا، جن میں المیر، حبیب گروپ اور مارک اسٹون شامل ہیں۔
متحدہ عرب امارات کی ریئل اسٹیٹ کی کمپنی المیر ریئل اسٹیٹ بروکریج دبئی کے بانی وچیئرمین کریم عامر علی نے پاکستان کے تعمیراتی شعبے میں 20 سے 25 ارب ڈالر کی سرمایہ کاری کا اعلان کرتے ہوئے کہا ہے کہ پاکستان کی بڑھتی ہوئی آبادی اور بڑے پیمانے پر رہائشی وکمرشل یونٹس کی طلب یو اے ای کے ریئل اسٹیٹ سے وابستہ سرمایہ کاروں کے لیے ایک منافع بخش مارکیٹ ہے۔
اس موقع پر حکومت پاکستان کے مشیر برائے اوورسیز پاکستانیز سردار قیصر حیات نے کہا کہ تعمیراتی شعبے میں متحدہ عرب امارات کی سرمایہ کاری سے نہ صرف خوشحالی آئے گی بلکہ رہائشی سہولیات کے بین الاقوامی معیار کو بھی متعارف کرایا جائے گا۔
چیئرمین آباد آصف سم سم نے المیر ریئل اسٹیٹ بروکریج دبئی کی جانب سے کراچی میں تعمیراتی شعبے میں 25 ارب ڈالرز کی سرمایہ کاری کا خیر مقدم کرتے ہوئے کہا کہ بیرونی سرمایہ کاری سے پاکستان کے تعمیراتی شعبے میں انقلاب برپا ہوگا۔
