عمر شریف کو مداحوں سے بچھڑے 2 برس بیت گئے

عمر شریف کو مداحوں سے بچھڑے 2 برس بیت گئے


لیجنڈری کامیڈین و اداکار عمر شریف کو اپنے مداحوں سے بچھڑے آج 2 سال بیت گئے۔

عمر شریف 19 اپریل 1955ء کو کراچی کے علاقے لیاقت آباد میں پیدا ہوئے، اُنہوں نے اسٹیج ڈراموں سے اپنے کیریئر کا آغاز ’عمر ظریف‘ کے نام سے بطور اسٹیج پرفارمر کیا۔

بعد ازاں اُنہوں نے اپنا نام بدل کر ’عمر شریف‘ رکھ لیا اور پھر اسی نام سے اُنہوں نے دنیا بھر میں اپنی پہچان بنائی۔

عمر شریف کے مقبول ترین مزاحیہ ڈراموں میں ’بکرا قسطوں پر‘ اور ’بڈھا گھر پر ہے‘ سرِ فہرست ہیں، ان کی مقبول ترین فلموں میں ’مسٹر 420‘، ’مسٹر چارلی‘، ’خاندان‘ اور ’لاٹ صاحب‘ شامل ہیں۔

لیجنڈری کامیڈین و اداکار کو پاکستان انٹرٹینمنٹ انڈسٹری کے لیے ناقابلِ فراموش خدمات کے لیے کئی اعزازات سے بھی نوازا گیا تھا۔

عمر شریف کو 1992ء میں ریلیز ہونے والی فلم ’مسٹر 420‘ کے لیے بہترین اداکاری اور ہدایت کاری پر 2 قومی ایوارڈز دیے گئے، اس کے علاوہ انہیں 10 نگار ایوارڈز بھی دیے گئے۔

لیجنڈری کامیڈین و اداکار کو ان کی خدمات کے لیے تمغۂ امتیاز سے بھی نوازا گیا۔

عمر شریف کا ایوارڈز کی دنیا میں ریکارڈ

عمر شریف ایوارڈز کی دنیا میں بھی ریکارڈ اپنے نام رکھتے ہیں، وہ واحد اداکار ہیں جنہوں نے 1 ہی سال میں 4 نگار ایوارڈز اپنے نام کیے جو بلاشبہ کسی بھی فنکار کے لیے ایک بڑا اعزاز ہے۔

واضح رہے کہ عمر شریف 2 اکتوبر 2021ء کو دل کا دورہ پڑنے کی وجہ سے جرمنی میں انتقال کر گئے تھے، اپنے شاندار شوبز کیریئر کی وجہ سے وہ اس دنیا سے رخصت ہو جانے کے بعد بھی اپنے مداحوں کی دلوں میں زندہ ہیں۔


اپنا تبصرہ لکھیں