پاکستانی شوبز انڈسٹری کی معروف ماڈل، میزبان و اداکارہ نتاشا حسین نے حال ہی میں دیئے گئے اداکار شہروز سبزواری سے متعلق متنازع بیان پر معافی مانگ لی ہے۔
اداکارہ نتاشا حسین نے اپنے سوشل میڈیا اکاؤنٹ انسٹاگرام پر اسٹوری کے ذریعے ایک بیان جاری کیا ہے۔
44 سالہ خوبرو ماڈل نتاشا حسین کا معذرت کرتے ہوئے اپنی اسٹوری میں لکھنا ہے کہ میں اپنے دیے گئے بیان پر معذرت خواہ ہوں، میں نے ایسا کہا تھا مگر میرا یہ ہر گز مطلب نہیں تھا۔
نتاشا حسین مزید کہا کہ شہروز سبزواری اچھے اداکار ہیں، ان کے بارے میں جو کہا غلط تھا، پاکستان اس وقت بُرے حالات سے گزر رہا ہے مگر پھر بھی لوگوں کے پاس اتنا فضول وقت ہے کہ لوگ ہر بات کو بڑھا چڑھا کر پیش کرتے ہیں، لوگوں کو اپنی زندگی پر توجہ دینی چاہیے، کمال ہے کہ بات پکڑنے کا فن لوگوں کی تفریح بن چکا ہے۔
نتاشا حسین نے ایک بار پھر سے اپنی اسٹوری میں معافی مانگتے ہوئے لکھا کہ متعلقہ شخص سے معذرت اور اُن لوگوں پر افسوس ہے جنہوں نے اس بات کو اپنے لیے فکر کا لمحہ بنا لیا ہے
واضح رہے کہ حال ہی میں نتاشا حسین نے ایک نجی چینل کے پروگرام میں بطور مہمان شرکت کی تھی جہاں اُنہوں نے پاکستانی انٹرٹینمینٹ انڈسٹری میں موجود اقرباپروری کے حوالے سے پوچھے گئے سوال پر جواب دیا تھا۔
نتاشا علی کا سینئر اداکار بہروز سبزواری کے بیٹے شہروز سبز واری کا نام لیتے ہوئے کہنا تھا کہ وہ اچھے اداکار نہیں ہیں اور اُنہیں شوبز انڈسٹری میں کام صرف اپنے والد کی وجہ سے ملا ہے تاہم ان کے والد بہروز سبزواری بہترین اداکار ہیں۔
اسی طرح انہوں نے ایک اور سوال کے جواب میں آمنہ حق کو بہترین ماڈل اور بُری اداکارہ قرار دیا تھا جبکہ سونیا امام کے بارے میں بات کرتے ہوئے اُن کا کہنا تھا کہ وہ سونیا امام کو ماڈل نہیں سمجھتیں۔
