بھارتی تحقیقاتی ادارے سنٹرل بیورو آف انویسٹی گیشن (سی بی آئی) کا سمیر وانکھیڑے کے خلاف کرپشن کے مقدمے کی تحقیقات کے سلسلے میں اداکار شاہ رخ خان اور ان کے بیٹے آریان خان کے بیانات ریکارڈ کرنے کا ارادہ ہے۔

بھارتی میڈیا کی رپورٹ کے مطابق، اس معاملے سے واقف ایجنسی کے ایک اہلکار نے نام ظاہر نہ کرنے کی شرط پر بتایا کہ اس معاملے کی تہہ تک پہنچنے کے لیے شاہ رخ خان اور آریان خان کے بیانات ریکارڈ کرنا ضروری ہیں اس لیے ہم جلد ہی ان دونوں کے بیانات ریکارڈ کریں گے۔

اہلکار نے مزید بتایا کہ سمیر وانکھیڑے کی جزوی تحقیقات ایجنسی نے پہلے ہی مکمل کر لی ہیں لیکن اس سے باضابطہ طور پر تفصیلی پوچھ گچھ کرنے کے لیے ایجنسی عدالت کی منظوری کا انتظار کر رہی ہے کیونکہ بمبئی ہائی کورٹ نے سمیر وانکھیڑے کو 23 جون تک گرفتاری سے عبوری تحفظ فراہم کیا ہوا ہے۔

واضح رہے کہ سال 2021ء میں این سی بی ممبئی زون کے سربراہ کے طور پر سمیر وانکھیڑے اداکار شاہ رخ خان کے بیٹے آریان کو گرفتار کرنے کے بعد تنازعات میں الجھ گئے ہیں۔

گزشتہ ماہ سی بی آئی کی جانب سے سمیر وانکھیڑے کے خلاف کرپشن کا مقدمہ درج کیا گیا ہے۔