بالی ووڈ کنگ شاہ رخ خان اور اداکارہ پریانکا چوپڑا کے درمیان قریبی تعلقات ہونے کے بارے میں بھارتی میڈیا پر ماضی میں مختلف قسم کی خبریں گردش کرتی رہیں۔
اس حوالے سے شاہ رخ خان نے ایک انٹرویو کے دوران پریانکا چوپڑا کا نام لیے بغیر افسوس کا اظہار کرتے ہوئے کہا کہ لوگ اس خاتون سے جن کے ساتھ وہ پہلے کام کر چکے ہیں پوچھ گچھ پر توجہ مرکوز کر رہے ہیں بجائے اس کے کہ وہ ان کو عزت دیں بالکل ویسے ہی جیسے میں ذاتی طور پر ان خاتون کو بلکہ سب خواتین کو ہی عزت دیتا ہوں۔
اُنہوں نے پریانکا چوپڑا کی تعریف کرتے ہوئے کہا کہ وہ ایک چھوٹی سی لڑکی ہے ابھی مجھے صحیح سے یاد نہیں ہے جس نے اپنا مس انڈیا یا شاید مس ورلڈ کا تاج پہنتے ہوئے میرے ساتھ اپنا سفر شروع کیا تھا۔
اُنہوں نے مزید کہا کہ ہم نے اچھے دوستوں کی طرح اسکرین پر کچھ بہترین لمحات کا اشتراک کیا لیکن یہ بدقسمتی کی بات ہے کہ ہماری اس دوستی کو غلط رنگ دیا گیا۔
واضح رہے کہ شاہ رخ خان نے پریانکا چوپڑا کے ساتھ فلم ’ڈان‘ میں کام کیا تھا اور اس دوران دونوں اداکاروں کی بہت اچھی دوستی ہوگئی یہاں تک کہ وہ اکثر پارٹیز، نائٹ کلبز اور دیگر اجتماعات میں اکٹھے نظر آنے لگے۔
اس دوستی میں جہاں پریانکا چوپڑا سرِ عام بھارتی فلم نگری کے بادشاہ کی تعریفیں کرتی نظر آئیں تو وہیں شاہ رخ خان نے بھی اُنہیں اپنے دل کے قریب رکھا۔
شاہ رخ کی اہلیہ گوری خان سمیت انڈسٹری کے کچھ لوگوں نے مبینہ طور پر اس دوستانہ تعلق کی مخالفت کی۔
جیسے ہی 2011ء میں شاہ رخ خان اور پریانکا چوپڑا کے درمیان قریبی تعلقات قائم ہونے کی افواہیں پھیلنا شروع ہوئیں تو شاہ رخ خان کے چاہنے والے حیران رہ گئے اور اُنہیں یہ سوچ کر بہت مایوسی ہوئی کہ ان کے پسندیدہ اداکار اپنی ایک خوشگوار فیملی ہونے کے باوجود بھی کسی دوسری عورت میں دلچسپی لے رہے ہیں۔
