خیبرپختونخوا کے ضلع باجوڑ میں لوئیسام کے علاقے میں دہشت گردوں کے ساتھ فائرنگ کے تبادلے میں پاک فوج کا جوان شہید ہوگیا۔
پاک فوج کے شعبہ تعلقات عامہ (آئی ایس پی آر) کی جانب سے جاری بیان کے مطابق ضلع باجوڑ کے شہری علاقے لوئیسام میں دہشت گردوں اور فوجی اہلکاروں کے درمیان فائرنگ کا تبادلہ ہوا۔
بیان میں کہا گیا کہ فوجی اہلکاروں نے دہشت گردوں کے ٹھکانے پر مؤثر کارروائی کی اور ایک دہشت گرد مارا گیا۔
آئی ایس پی آر نے بتایا کہ فائرنگ کے تبادلے کے دوران ڈیرہ اسمٰعیل سے تعلق رکھنے والے 23 سالہ سپاہی شفیق الرحمٰن نے بہادری سے لڑتے ہوئے جام شہادت نوش کیا۔
بیان میں کہا گیا کہ علاقے میں کسی دہشت گرد کی موجودگی کے خدشے کے پیش نظر کارروائی کی جارہی ہے تاکہ اس کا خاتمہ کیا جائے۔
آئی ایس پی آر نے بتایا کہ پاکستان کی مسلح افواج دہشت گردی کے ناسور کے خاتمے کے لیے پرعزم ہے اور ہمارے بہادر جوانوں کی یہ قربانیاں ہمارے عزم کو مزید مضبوط کرتی ہیں۔
خیال رہے کہ کالعدم پاکستان تحریک طالبان (ٹی ٹی پی) نے گزشتہ برس نومبر میں حکومت کے ساتھ سیز فائر ختم کرنے کا اعلان کرتے ہوئے اپنے دہشت گردوں کو ملک بھر میں کارروائیوں کی ہدایت کی تھی، جس کے بعد ملک بھر میں خاص طور پر خیبرپختونخوا اور بلوچستان میں دہشت گردوں کی جانب سے کارروائی میں اضافہ ہوا ہے۔
دوسری جانب مسلح افواج کی جانب سے بھی دہشت گردوں کے خلاف کارروائیوں میں تیزی لائی گئی ہے۔
آئی ایس پی آر نے گزشتہ روز ایک بیان میں بتایا تھا کہ فورسز نے ضلع بنوں میں جانی خیل کے علاقے میں خفیہ اطلاع کی بنیاد پر کارروائی کرکے 2 دہشت گردوں کو ہلاک کردیا تھا۔
اس سے قبل رواں ماہ کے اوائل میں خیبرپختونخوا کے ضلع شمالی وزیرستان کے علاقے دیردونی میں دہشت گردوں کے ساتھ فائرنگ کے تبادلے کے دوران پاک فوج کے 6 اہلکار شہید ہوگئے تھے۔
آئی ایس پی آر کے ڈائریکٹر جنرل (ڈی جی) میجر جنرل احمد شریف چوہدری نے پریس بریفنگ کے دوران بتایا تھا کہ گزشتہ برس دہشت گردی کے 436 واقعات ہوئے، جن میں 293 افراد شہید اور 521 افراد زخمی ہوئے۔
خیبرپختونخوا میں دہشت گردی کے 219 واقعات میں 192 افراد شہید ہوئے، بلوچستان میں 206 واقعات ہوئے اور 80 افراد اپنی جان گنوا بیٹھے، پنجاب میں 14 افراد اور سندھ بھر میں ہونے والے 6 مختلف واقعات میں 7 افراد شہید ہوئے۔
ڈی جی آئی ایس پی آر نے کہا کہ فوج اور قانون نافذ کرنے والے اداروں گزشتہ برس خفیہ اطلاعات کی بنیاد پر 8 ہزار 269 کارروائیاں کیں۔
ان کا کہنا تھا کہ ان کارروائیوں کے دوران ایک ہزار 378 متشبہ دہشت گردوں کو گرفتار کیا گیا اور 157 مارے گئے۔
ڈی جی آئی ایس پی آر کا کہنا تھا کہ رواں برس انسداد دہشت گردی کی کارروائیوں میں اب تک 137 سیکیورٹی اہلکار شہید اور 117 زخمی ہوگئے ہیں۔
