یونان کے وزیراعظم کریاکوس میتسوتاکیس نے ٹرین حادثے میں متاثرہ فیملیز سے معافی مانگ لی۔
میڈیا رپورٹس کے مطابق یونان کے وزیراعظم کریاکوس میتسوتاکیس نے ٹرین حادثے میں ہلاک ہونے والے 57 افراد کے اہلخانہ سے سوشل میڈیا کے ذریعے معافی مانگی ہے۔
یونان کے وزیراعظم نے اپنے بیان میں کہا کہ میں تمام متاثرین کا مقروض ہوں ایک ہی لائن پر دو مختلف سمتوں سے آنے والی ٹرینیں نہیں چل سکتیں۔
دوسری جانب یونان میں ٹرین حادثے کے بعد ہزاروں افراد نے اپنا احتجاج ریکارڈ کروایا، اس دروان مظاہرین اور پولیس کے درمیان چھڑپیں ہوئیں جس میں کئی افراد زخمی اور گرفتار ہوئے۔
پولیس کے مطابق مظاہرے میں شریک افراد نے پیٹرول بموں کا استعمال کیا جس کے بعد پولیس کی جانب سے آنسو گیس فائر کیے گئے جب کہ مظاہرین نے سیاہ رنگ کے غباروں کو فضا میں چھوڑ کراپنا احتجاج ریکارڈ کرایا۔
واضح رہے کہ یونان میں 28 فروری کو دو ٹرینوں کے درمیان تصادم ہوا جس میں 57 افراد ہلاک ہوگئے تھے۔
