بھارتی اداکار نواز الدین صدیقی نے انکشاف کیا ہے کہ انہیں فلم کی شوٹنگ میں ایک چیز سب سے زیادہ پریشان کرتی ہے۔
غیر ملکی میڈیا کے مطابق حال ہی میں بھارتی فلم انڈسٹری کے معروف اداکار نواز الدین صدیقی انٹرنیشنل فلم فیسٹیول آف انڈیا (آئیفا) کے حوالے سے ایک نشست میں شریک ہوئے۔
اس دوران انہوں نے انکشاف کیا کہ انہیں شوٹنگ کے دوران جو چیز سب سے زیادہ پریشان کرتی ہے وہ شاٹ کے دوران لائٹس، کیمرہ، ایکشن کہنے کا روایتی طریقہ ہے۔
اداکار کا کہنا تھا کہ یہ سب بتاتے ہوئے انہیں افسوس ہے لیکن یہ حقیقت ہے اور مجھے یہ بتانا ہے تاکہ لوگوں کو معلوم ہوسکے۔
نواز الدین صدیقی نے کہا کہ جب ہم فلم کے کسی بھی سین کی شوٹنگ شروع کرتے ہیں تو بہت ساری آوازیں اور شور سنائی دیتا ہے اور پھر اس ماحول میں ہدایت کار اداکاروں سے بہترین کام کی توقع کرتا ہے۔
انہوں نے کہا کہ ہمیں اچانک کہا جاتا ہے کہ شاٹ تیار ہے اور پھر ایکشن کی آواز، کیا ہم کمپیوٹر ہیں؟ میرا یہ ماننا ہے کہ اگر سیٹ پر روایتی شور شرابے کے بجائے خاموشی ہو تو ہم اس سے بھی بہتر کام کرسکتے ہیں۔
اداکار نواز الدین کا کہنا تھا کہ اداکار اپنے کیریئر میں مختلف کردار ادا کرتے ہیں لیکن جب بھی کوئی اداکار کسی نئے کردار میں خود کو ڈھالتا ہے تو اسے اس پرانے کردار سے نکلنا ہوتا ہے ،اس موقع پر کردار کی وضاحت میں کمی پریشان کرتی ہے، اس لیے جب آپ کچھ نیا شروع کریں تو اپنے پہلے نقش پا کو مٹا دیں۔
