معروف بھارتی اداکارہ نوپور النکار سڑکوں پر بھیک مانگنے لگیں۔
حال ہی میں اداکارہ نے شوبز انڈسٹری اور شوہر سے سنیاس (تارک الدنیا) لے لیا تھا اور اب وہ سادھو بن کر سڑکوں پر بھیک مانگ رہی ہیں۔
نوپور النکار نے سڑکوں پر بھیک مانگنے کی ویڈیو خود اپنے سوشل میڈیا اکاؤنٹ سے شیئر کی اور بتایا کہ صبح سے بھیک میں 21 بھارتی روپے ہی ملے ہیں اور کسی نے دان میں چاول تو کسی نے پیڑا دیا ہے۔
بھارت میڈیا رپورٹس کے مطابق نوپور کا ممبئی میں گھر بھی ہے جسے انہوں نے کرائے پر دے رکھا ہے اور وہ شوہر و ساس کی اجازت سے تارک دنیا ہوئی ہیں۔
کئی دن قبل اس حوالے سے اداکارہ کا کہنا تھا کہ انہوں نے فینسی پہناوے ترک کر دیے ہیں، ایک وقت کا کھانہ کھاتی ہیں، زمین پر سوتی ہیں اور سادہ سیفرن کا لباس پہنتی ہیں، اب وہ خود کو کافی پرسکون محسوس کرتی ہیں۔
انہوں نے کہا تھا کہ وہ ہمیشہ سے روحانیت کی طرف مائل تھیں اور ادھیاتم کے فلسفے سے متاثر رہی ہیں لیکن اب وہ وقت آگیا تھا جب انہیں لگا کہ وہ پوری طرح سے اپنی ذات کو اس کیلئے وقف کر سکتی ہیں۔
ان کا کہنا تھا کہ وہ اب اداکاری یا شوبز انڈسٹری کو بلکل بھی یاد نہیں کرتی، ان کی زندگی میں اب ڈرامے کیلئے کوئی جگہ نہیں ہے، وہ تمام خرابیاں اور جھوٹ اب پیچھے چھوڑ دیے ہیں جو ہم ٹی وی اسکرین یا اس سے ہٹ کر بولتے یا کرتے تھے۔
نوپور الانکر نے کہا تھا کہ 2020 میں والدہ کے دیہانت کے بعد انہیں احساس ہوا کہ اب انہیں کسی بھی چیز کے کھوجانے کا خوف نہیں اور وہ خود کو تمام خواہشوں اور تمام زمہ داریوں سے آزاد محسوس کرنے لگی تھیں۔
بھارتی اداکارہ نے کہا تھا کہ میں نے سنیاس لینے کے حوالے سے اپنے شوہر کو بتایا اور انہوں نے میری خواہش کا احترام کرتے ہوئے مجھے شادی کے بندھن سے آزاد کر دیا ہے، انکے خاندان کی جانب سے بھی میرے فیصلے کا احترام کیا گیا۔
واضح رہے کہ نوپور النکار 27 سالوں تک بھارتی ٹی وی انڈسٹری سے وابستہ رہیں، انہوں نے 157 سے زائد ٹی وی ڈراموں اور پروگراموں میں کام کیا جبکہ وہ بھارت کے مشہور ڈرامہ شکتی مان میں بھی اداکاری کے جوہر دکھا چکی ہیں۔
