وزیر تجارت نوید قمر نے ملک میں گندم درآمد کرنے کی وجہ بتادی ہے۔
آج بروز منگل قومی اسمبلی کا اجلاس ہوا جس میں اظہار خیال کرتے ہوئے وفاقی وزیر تجارت نوید قمر کا کہنا تھا کہ گذشتہ تین سالوں میں 9 ممالک سے گندم درآمد کی گئی ہے۔
انہوں نے کہا کہ سال 2020-21 میں 98 کروڑ 33 لاکھ ڈالرز کی گندم درآمد کی گئی جبکہ سال 2021-22 میں جنوری تک 62 کروڑ 74 لاکھ ڈالرز کی گندم درآمد کی گئی ہے۔
نوید قمر کا کہنا تھا کہ گندم کی خرید کے اہداف مکمل کیے جارہے ہیں جبکہ ملک میں کھاد کی عدم دستیابی اور موسمی حالات کی وجہ سے گندم کی فصل کم ہوئی ہے۔
وزیر تجارت کا کہنا تھا کہ گندم کے اسٹاکس مکمل رکھنے کے لئے ضروری اقدامات کیے جائیں گے، جدید گودام بنانے ہوں گے تاکہ گندم خراب نہ ہو اور نہ اسے چوہے کھائیں۔
انہوں نے مزید کہا کہ گندم کی اسمگلنگ پر قابو پانے کے لئے بھی ضروری اقدامات کئے جارہے ہیں۔
