شکاگو: حال ہی میں شائع ہونے والی ایک تحقیق میں بتایا گیا ہے کہ ملازمت میں تحفظات کے شکار ادھیڑ عمر افراد میں یادداشت کی کمی کا امکان زیادہ ہوجاتا ہے۔
ماہرین نے یادداشت کا جائزہ لینے کیلئے چند ٹیسٹس پر مشتمل مطالعہ ترتیب دیا جس میں ملازمت کے حوالے سے عدم تحفظات کے شکار 50 سے 60 برس کے افراد اور ملازمت سے مطمئن شرکا نے حصہ لیا۔
محققین نے بتایا کہ جن شرکاء کو نوکری سے نکالے جانے یا جبری ریٹائرمنٹ پر مجبور کیے جانے کا خدشہ تھا ان کے میموری ٹیسٹس میں اوسطاً 3 فیصد کم اسکور تھے۔
محققین کے مطابق ملازمت کے حوالے سے عدم تحفظ کے شکار افراد میں موٹاپے کا امکان تقریباً 10 فیصد، اور عارضہِ قلب اور ذیابیطس کے امکانات 20 فیصد تھے۔ علاوہ ازیں محققین کا یہ بھی کہنا تھا کہ ان ادھیڑ عمر افراد میں ڈپریشن کا امکان بھی بنسبت دوسرے شرکا کے تقریباً دوگنا تھا۔
مطالعہ کے شریک مصنف لنڈسے کوبایاشی نے بتایا کہ نوکری چلی جانے کی فکر یا خوف 55 سال کی عمر کے بعد یادداشت کو بُری طرح متاثر کرسکتا ہے۔
