لاہور:
بابر اعظم ٹیم کی کارکردگی میں تسلسل کے خواہاں ہیں جب کہ کپتان کا کہنا ہے کہ کسی بھی مرحلے پر سہل پسندی کا شکار ہونے کی گنجائش نہیں۔
آئی سی سی کی جانب سے جاری کردہ ویڈیو میں بابر اعظم نے کہاکہ میں بچپن میں سوچتا تھا کہ ایک بہترین بیٹسمین بننا ہے جسے دنیا بھر میں شائقین سپورٹ کریں،میں اب بھی پرستاروں کی توقعات پر پورا اترتے ہوئے اپنی پرفارمنس سے انھیں خوشیاں فراہم کرنے کی کوشش کرتا ہوں،مقصد یہی ہے کہ ایک ایسی قومی ٹیم بن جائے جو اپنی کارکردگی میں تسلسل سے ملک کا نام روشن کرے۔
انھوں نے کہا کہ کسی بھی مرحلے پر سہل پسندی کا شکار ہونے کی گنجائش نہیں، کسی حریف کو بھی ہلکا سا موقع بھی دیا توبازی ہاتھ سے نکل جائیگی۔
دوسری جانب بابراعظم کے بارے میں بات کرتے ہوئے سابق ہیڈ کوچ مکی آرتھر نے کہا کہ میں نے نوجوان بیٹسمین کی صلاحیتوں کو نکھرتے اور کیریئر کو آگے بڑھتے ہوئے دیکھا ہے،کوچز تکنیک کی بات کرتے ہیں لیکن میں نے ان کے ٹیلنٹ کو دیکھتے ہوئے نیچرل انداز میں کھیلنے کی آزادی اور مواقع دیے،وہ حیران کن صلاحیتوں کے مالک ہیں، جہاں بھی بیٹنگ کررہے ہوں میں ان کو دیکھتا ہوں۔
ساتھی کھلاڑی محمد رضوان نے کہا کہ بابر سوئنگ، سیم یا اسپن ہر طرح کی بولنگ اور کنڈیشنز میں اچھا پرفارم کرتے ہیں،میں ان کو بہت ہی خاص بیٹسمین سمجھتا ہوں۔
عماد وسیم نے کہا کہ 4سال قبل بابر اعظم کا محنت کرنے کیلیے جذبہ دیکھا تب ہی کہا تھا کہ وہ ایک بڑے کرکٹر کے روپ میں سامنے آئیں گے،اب نہ صرف بطور بیٹسمین بلکہ ایک پختہ کار کپتان کے طور پر بھی اپنی صلاحیتوں کا اظہار کررہے ہیں۔
بولنگ کنسلٹنٹ ورنون فلینڈر نے کہا کہ بابر اپنے اعتماد کی بدولت میدان میں بہادری سے فیصلے کرتے ہیں۔
