کنگسٹن ٹیسٹ میں پاکستانی ٹیم پہلی اننگز میں 217 رنز بنا کر آؤٹ ہوگئی، فواد عالم نے 56 اور فہیم اشرف نے 44 رنز بنائے
۔کنگسٹن ٹیسٹ کے پہلے روز ویسٹ انڈیز نے ٹاس جیت کر بولنگ کا فیصلہ کیا تو پاکستانی اوپنرز اچھا آغاز فراہم کرنے میں ناکام رہے، عمران بٹ اور عابد علی کو کیمار روئچ اور جیڈن سیلز نے پریشان کیا۔
بیٹسمینوں کا اعتماد بحال ہونے لگا تھا کہ روئچ نے عمران بٹ(11) کا شکار کرلیا،اسٹریٹ ڈرائیو کھیلنے میں ناکامی پر ان کی بیلز فضا میں بکھر گئیں،اگلے ہی اوور میں عابد علی(9) بھی چل دیے، جیڈن سیلز کی گیند بیٹ کا کنارہ چھوتی ہوئے وکٹ کیپر جوشوآ ڈا سلوا کے گلوز میں محفوظ ہوگئی،دونوں اوپنرز 21رنز کے سفر میں پویلین لوٹ گئے۔
بابر اعظم نے باؤنڈری سے کھاتہ کھولا،اظہر علی نے روایتی سست روی سے آغاز کیا، انھوں نے کائل میئرز کی گیندوں کا خطرناک انداز میں سامنا کیا،جیسن ہولڈر نے بھی اچھی لائن و لینتھ سے رنز کا حصول دشوار بنائے رکھا،پاکستان نے 17اوورز میں 34رنز بنائے تھے کہ بارش کی وجہ سے کھیل روکنا پڑ گیا، اس وقت بابر اعظم نے 10اور اظہر علی نے27گیندوں پر صرف 3رنز بنائے تھے۔
اس صورتحال میں لنچ بریک قبل ازوقت ہی کردیا گیا،ڈیڑھ گھنٹے کا تعطل ختم ہونے کے بعد پہلے ہی اوور میں جیسن ہولڈر کی اٹھتی ہوئی گیند پر اظہر علی کو وکٹوں کے پیچھے کیچ قرار دیا گیا مگر انھوں نے ریویو کی مدد سے اپنی وکٹ بچالی،مسلسل 3میڈن اوورز کے بعد پاکستان نے اسکور بورڈ متحرک کیا، بابر اعظم نے پریشان کرنے والے کیمار روئچ کو چوکے سے جواب دیا۔
جیسن ہولڈر کی گیند پر اظہر علی(7) کو ایل بی ڈبلیو قرار دیا گیا مگر انھوں نے پھر تھرڈ امپائر سے رجوع کرکے وکٹ بچالی،اسی اسکور پر جیسن ہولڈر کا ان کیخلاف ایل بی ڈبلیو ریویو بھی بے کار گیا، چانسز ملنے کے باوجود اظہر 17 رنز بنا کر سیلز کی گیند پر سلپ میں ہولڈر کو کیچ دے بیٹھے،بابر (30) کا روئچ کی گیند پر وکٹ کیپر نے کیچ لیا، میزبان ٹیم نے ریویو کی مدد سے فیصلہ حق میں تبدیل کرایا۔
پاکستانی ٹیم پہلی اننگز میں 217 رنز بنا کر آؤٹ ہوگئی۔ فواد عالم 56 اور فہیم اشرف نے 44 رنز بنائے۔
یاد رہے کہ پاکستان نے مضبوط پیس بیٹری کے ساتھ میدان میں اترنے کا فیصلہ کیا،شاہین شاہ آفریدی اور حسن علی کا ساتھ دینے کیلیے محمد عباس اور بولنگ آل راؤنڈر فہیم اشرف منتخب ہوئے،تجربہ کار لیگ اسپنر یاسر شاہ کا کم بیک ہوا۔
نعمان علی کو ڈراپ کرنے کا فیصلہ حیران کن ہے،اسپنر نے اپنے گذشتہ ٹیسٹ میں 97رنز اسکور کرنے کے ساتھ 86رنز دے کر 5شکار بھی کی تھے،یوں نعمان ایک میچ میں ففٹی اور 5وکٹوں کے بعد دوسرے ٹیسٹ میں ڈراپ کردیے جانے والے پاکستانی کرکٹ تاریخ کے پہلے کرکٹر بن گئے۔
دوسری جانب اظہر علی اپنے کیریئر کے88ویں ٹیسٹ کیلیے میدان میں اترے، زیادہ میچز کھیلنے والوں کی فہرست میں وہ عمران خان کو جوائن کرتے ہوئے ساتویں نمبر پر آگئے، 124 ٹیسٹ کے ساتھ جاوید میانداد سب سے آگے ہیں۔
