معروف امریکی اقتصادی جریدے ’فوربز‘ نے ہر سال کی طرح سال 2020 کی سب سے زیادہ کمائی کرنے والی دنیا بھر کی 100 شخصیات کی فہرست جاری کردی۔
’فوربز‘ فہرست کے مطابق رواں سال کورونا وائرس کی وبا کے باعث کئی شوبز و کھیل کے شعبے کی شخصیات کی کمائی میں واضح کمی دیکھی گئی جب کہ اس سال مجموعی طور پر 100 شخصیات نے گزشتہ سال کے مقابلے 20 کروڑ ڈالر کم کمائی کی۔
اس سال سب سے زیادہ کمائی کرنے والی 100 شخصیات نے مجموعی طور پر 6 ارب 10 کروڑ ڈالر کی کمائی کی، جس میں سے صرف ایک ہی شخصیت کی کمائی 59 کروڑ ڈالر ہے۔
حیران کن طور پر اس سال سے سب سے زیادہ کمائی کرنے والی شخصیت 22 سالہ ٹی وی اسٹار و ماڈل کایلی جینر ہیں، جنہوں نے گزشتہ 12 ماہ کے دوران 59 کروڑ امریکی ڈالر کمائے۔
کایلی جینر کو فوربز نے حال ہی میں سب سے کم عمر ارب پتی بننے والی فہرست سے خارج کیا تھا، میگزین کے مطابق کایلی جینر نے ارب پتی بننے سے متعلق حقائق کو خفیہ رکھا، میگزین نے انہیں 2019 میں دنیا کی کم عمر ارب پتی قرار دیا تھا۔
فوربز کی 2020 کی فہرست میں ٹیلر سوئفٹ سب سے زیادہ کمائی کرنے کے حوالے سے 25 ویں نمبر پر ہیں، گزشتہ برس وہ پہلے نمبر پر تھیں۔
سال 2019 میں ٹیلر سوئفٹ کی کمائی 18 کروڑ 50 لاکھ ڈالر تھی، رواں سال ان کی کمائی ساڑھے 6 کروڑ ڈالر سے بھی کم ہوگئی۔
کایلی جینر گزشتہ برس اس فہرست میں دوسرے نمبر پر تھیں اور انہوں نے گزشتہ سال 17 کروڑ ڈالر کمائے تھے مگر رواں سال کورونا کے باوجود انہوں نے گزشتہ سال کے مقابلے تین گنا زیادہ پیسے کمائے اور ان کی مجموعی کمائی 59 کروڑ ڈالر رہی۔
سب سے زیادہ کمائی کرنے والی 100 شخصیات میں بھارت سے صرف ایک ہی شخصیت بولی وڈ کھلاڑی اکشے کمار جگہ بنانے میں کامیاب گئے اور وہ فہرست میں 52 ویں نمبر پر ہیں۔
اکشے کمار نے گزشتہ 12 ماہ میں 4 کروڑ 82 لاکھ ڈالر تک کی کمائی کی، حیران کن طور پر چینی سپر اسٹار جیکی چن، ہولی وڈ اداکارہ و گلوکارہ جینیفر لوپیاز، گلوکارہ ریانا، ادکار ول سمتھ، ٹینس اسٹار نوواک جوکووچ، ٹریوس اسکاٹ اور اوپرا ونفرے بھی کمائی میں ان سے پیچھے رہیں۔
دلچسپ بات یہ ہے کہ جہاں اس فہرست میں کایلی جینر 59 کروڑ امریکی ڈالر کمائی کے ساتھ سرفہرست رہیں، وہیں ان کے بوائے فرینڈ اور ان کی بیٹی کے باپ گلوکار ٹریوس اسکاٹ تین کروڑ 95 لاکھ ڈالر کمائی کے ساتھ 82 ویں نمبر پر رہے۔
فہرست سے پتہ چلتا ہے کہ 22 سالہ ماڈل کایلی جینر کی کمائی ایک طرف اور ایک درجن بڑے اسٹارز و کھلاڑیوں کی کمائی دوسری طرف لیکن پھر بھی کایلی جینر کی کمائی ان سے زیادہ ہے۔
فہرست میں کایلی جینر کی سوتیلی بہن اور معروف ٹی وی اسٹار کم کارڈیشن کمائی کرنے کے حوالے سے 48 ویں نمبر پر ہے جب کہ ان کے منگیتر گلوکار کائنے ویسٹ 17 کروڑ ڈالر سے زائد کمائی کے ساتھ دوسرے نمبر پر ہیں.
