پاکستان شوبز انڈسٹری کے سینئر اداکار عدنان صدیقی نے پاکستان کی مشہور ڈرامہ سیریل ’میرے پاس تم ہو‘ کے بھارت میں نشر ہونے پر دلچسپ ردِ عمل کا اظہار کیا ہے۔
پاکستانی اداکاروں عائزہ خان، ہمایوں سعید اور عدنان صدیقی کے بھارتی مداحوں کو حال ہی میں یہ خوش خبری ملی ہے کہ وہ اپنے ان پسندیدہ اداکاروں کو اب بھارتی ٹی وی چینل ’زندگی‘ پر دیکھ سکیں گے۔
اس خبر پر عدنان صدیقی نے اپنے ردِعمل میں کہا ہے کہ یہ سن کر ایسا محسوس ہوا کہ سرحد پار میرے پڑوسی ملک میں بھی کوئی مجھے اب ٹی وی اسکرین پر دیکھے گا، جہاں میں پہلے سے ہی مشہور ہوں۔
اُنہوں نے کہا کہ لوگوں کے لیے اس ڈرامے کو دوبارہ دیکھنا ایک اچھی یاد رہے گی چونکہ اب یہ باضابطہ طور پر ’زندگی‘ چینل پر نشر ہونے جا رہا ہے تو اس کا احساس یوٹیوب جیسے مختلف پلیٹ فارمز پر ڈرامہ دیکھنے سے بالکل مختلف ہو گا۔
عدنان صدیقی نے پاکستانی ڈراموں کی بھارت میں مقبولیت کے بارے میں بات کرتے ہوئے انکشاف کیا ہے کہ 2017ء میں جب فلم ’موم‘ کی شوٹنگ کے لیے میں بھارت میں موجود تھا تو ایک دن نئی دہلی میں فلم کی شوٹنگ کے دوران کھانا کھانے کے لیے جانے سے پہلے بونی کپور نے مجھ سے کہا کہ اپنے ساتھ سیکیورٹی کو لے کر جانا چاہیے کیونکہ ہو سکتا ہے کہ لوگ مجھے پہلے سے جانتے ہوں۔
اُنہوں نے بتایا کہ میں نے بونی کپور کی بات سن کر سوچا کہ یہاں بھلا مجھے کون جانتا ہو گا تو میں بغیر سیکیورٹی کے ہی کھانا کھانے کے لیے چلا گیا اور وہاں میں نے اپنے جتنے مداح دیکھے میں حیران رہ گیا اور مجھے اپنی آنکھوں پر یقین نہیں آ رہا تھا۔
عدنان صدیقی نے بتایا کہ جب بڑی تعداد میں مداحوں نے مجھے گھیر لیا تو میں نے بونی کپور کو کال کی کہ سیکیورٹی بھیج کر مجھے یہاں سے نکالیں۔
اُنہوں نے پاکستانی ڈراموں کی تعریف کرتے ہوئے کہا کہ میں ہمیشہ کہتا ہوں کہ ہمارے ٹی وی ڈرامے بالکل بالی ووڈ فلموں کی طرح ہیں اور ہماری فلمیں بالکل بھارتی ٹی وی ڈراموں کی طرح ہیں۔
عدنان صدیقی نے پاکستانی ڈراموں کی مخصوص نوعیت کے حوالے سے کہا ہے کہ ٹیلیویژن پاکستان کا سب سے بڑا میڈیم ہے، ہمارے پاس یہاں فلموں سے بڑے مصننف اور اداکار ہیں، 70 اور 80 کی دہائی کے آغاز میں ہمارے ڈرامے پوری دنیا میں مشہور تھے۔
اُنہوں نے یہ بھی کہا کہ ٹیلیویژن کے لیے ہمیں تربیت ہی اس انداز میں دی گئی ہے کہ ہمارے ڈرامے خود بخود ہی اعلیٰ معیار کے بنتے ہیں۔
