ہدف کے تعاقب میں کراچی کنگز کیخلاف ملتان سلطانز کی بیٹنگ جاری

  کراچی: پاکستان سپر لیگ (پی ایس ایل) کے 14 ویں میچ میں 168 رنز ہدف کے تعاقب میں کراچی کنگز کے خلاف ملتان سلطانز کی بیٹنگ جاری ہے۔

ہدف کے جواب میں ملتان سلطانز کے کپتان محمد رضوان اور اوپنر شان مسعود نے اننگز کا آغاز کیا۔ شان مسعود 25 رنز بنا کر عاکف جاوید کی گیند پر وکٹ گنوا بیٹھے جبکہ شعیب ملک نے رائلی روسو کو 7 رنز پر پویلین کی راہ دکھائی۔

محمد رضوان کے ساتھ دینے کے لیے آنے والے ڈیوڈ ملر بھی اچھی اننگز فراہم نہ کر سکے اور 7 رنز بنا کر تبریز شمسی کی گیند پر کیچ دے بیٹھے۔

ملتان سلطانز نے 10 اوورز میں تین وکٹوں کے نقصان پر اب تک 70 رنز بنا لیے ہیں۔

کراچی کنگز کی اننگز

کراچی کنگز نے اننگز کا آغاز کیا تو اوپنر جیمز ونس 27 رنز بنا کر آؤٹ ہوئے جس کے بعد میتھیو ویڈ اور طیب طاہر نے دوسری وکٹ کی شراکت میں 109 رنز جوڑے۔

طیب طاہر نے ڈیبیو میں نصف سنچری بنائی اور 65 رنز بنا کر آؤٹ ہوئے جس کے بعد میتھیو ویڈ نے شعیب ملک کے ساتھ اسکور آگے بڑھانے کی کوشش کی لیکن میتھیو ویڈ 46 رنز بنا کر احسان اللہ کی گیند پر بولڈ ہوگئے۔

کپتان عماد وسیم 14 رنز اور شعیب ملک 10 رنز بنا کر ناٹ آؤٹ رہے۔

ٹاس

نیشنل اسٹیڈیم کراچی میں کھیلے جا رہے میچ میں ملتان سلطانز کے کپتان محمد رضوان نے ٹاس جیت کر پہلے فیلڈنگ کرنے کا فیصلہ کیا، انکا کہنا تھا کہ کوشش ہوگی میچ میں کامیابی سمیٹ کر پوائٹس ٹیبل پر اپنی پہلی پوزیشن مستحکم کریں۔

اس موقع پر کراچی کنگز کے کپتان عماد وسیم نے کہا کہ میچ میں فتح حاصل کرنا چاہتے ہیں، یہ ہوم گراؤنڈ پر ہمارا آخری میچ ہے کوشش ہوگی اچھی پرفارمنس دیں۔

دوسری جانب کراچی کنگز نے اپنے اسکواڈ میں تین تبدیلیاں کی ہیں، فاسٹ بولر محمد عامر، حیدر علی اور عمران طاہر کو آرام کروایا گیا ہے جبکہ محمد موسیٰ، طیب طاہر اور تبریز شمسی پلئینگ الیون کا حصہ ہوں گے۔