پاکستان شوبز انڈسٹری کی خوب رو اور معروف اداکارہ ہانیہ عامر نے بالی ووڈ کنگ کا انداز اپنا لیا، ویڈیو سوشل میڈیا پر شیئر کی اور تعریفیں سمیٹ لیں۔
فوٹو اینڈ ویڈیو شیئرنگ پلیٹ فارم انسٹاگرام پر اپنے ڈراموں سے ناظرین کو رُلانے والی اداکارہ ہانیہ عامر نے نئی ویڈیو شیئر کرکے مداحوں کو خوش کر دیا۔
مذکورہ ویڈیو میں ہانیہ عامر کو لندن کی سیر کرنے کے ساتھ بالی ووڈ کے کنگ شاہ رخ خان کا مخصوص انداز بھی اپنا لیا اور بور ہوتے ہوئے مداحوں کی بوریت کو پل بھر میں دور کر دیا۔
انہوں نے ایک مونٹاج شیئر کیا ہے جس میں انہیں دعا لیپا کے گانے ’لیویٹیٹ‘ اور شاہ رخ خان کی فلم بادشاہ کے گانے ’وہ لڑکی جو سب سے الگ ہے‘ کے میشن اپ پر، ان کا منفرد سگنیچر اسٹائل کاپی کرتے ہوئے دیکھا جاسکتا ہے۔
اس ویڈیو کے ساتھ ہی انہوں نے کنگ خان کا ڈائیلاگ بھی اپنے کیپشن میں لکھا کہ ’اے تم بور تو نہیں ہو رہے ناں؟‘، اور اس بات کا اظہار کیا کہ وہ شاہ رخ خان کی پرستار ہپں۔
ہانیہ عامر کی ویڈیو کو نہ صرف شوبز شخصیات کی جانب سے بلکہ سرحد پار صارفین بھی بےحد پسند کر رہے ہیں اور لکھ رہے ہیں کہ ’بھلے سیاست نے الگ کیا لیکن ’ایس آر کے‘ کی محبت نے ملا دیا‘۔
واضح رہے کہ یہ پہلا موقع نہیں ہے جب ہانیہ عامر نے شاہ رخ خان کے گانوں پر ان کے اسٹائل کو کاپی کیا ہو بلکہ اس سے قبل بھی انہوں نے بالی ووڈ کنگ کے مشہور گانوں پر ان کے سگنیچر اسٹیپ کئے تھے اور ویڈیو اپنے انسٹاگرام پر شیئر کی تھی۔
