پاکستان شوبز انڈسٹری کی معروف اداکارہ ہاجرہ یامین نے ساتھی اداکار محسن عباس حیدر کے ساتھ ویب سیریز میں کام کرنے پر وضاحت دے دی۔
بھارتی انتہا پسندی پر مبنی ویب سیریز ’سیوک‘ میں ہاجرہ یامین نے ایک بھارتی صحافی کا کردار ادا کیا، جس میں محسن عباس حیدر بھی ایک اہم کردار ادا کرتے نظر آرہے ہیں۔
ہاجرہ یامین نے اپنے ایک حالیہ انٹرویو میں محسن عباس حیدر کے ساتھ کام کے بارے میں پوچھے گئے سوال کے جواب میں کہا کہ ہماری شوبز انڈسٹری میں خواتین کے لیے ویسے ہی محدود کردار موجود ہیں، اس لیے میں نہیں چاہتی تھی کہ ایک دلچسپ اور انوکھا کردار چھوڑ دوں۔
اُنہوں نے مزید کہا کہ جہاں تک میرے اختیار میں ہوگا وہاں تک میں ضرور اپنا حصّہ ڈالوں گی جیسے کہ میں کسی ایسے پروگرام یا ایوارڈ شو میں شرکت نہیں کروں گی جہاں اس طرح کے مبینہ گھریلو تشدد کے ملزم موجود ہوں لیکن میں اپنی پیشہ ورانہ زندگی کو متاثر نہیں کرسکتی، اس لیے جب بھی مجھے موقع ملا تو منفرد کردار ضرور ادا کروں گی۔
اداکار محسن عباس کو اپنی سابقہ اہلیہ پر گھریلو تشدد کے الزامات پر شدید تنقید کا سامنا ہے۔
گھریلو تشدد کے الزامات عائد ہونے کے بعد شوبز انڈسٹری کے کئی لوگوں نے اداکار کے ساتھ کام کرنے سے انکار کردیا ہے۔
صرف اتنا ہی نہیں بلکہ مشہور میزبان رابعہ انعم نے تو ایک ٹی وی شو میں ان کے ساتھ بیٹھنے سے بھی معذرت کرلی تھی۔
